LEVITIKO 21:1-10

¹Iehova ese Mose e hereva henia, eto, Hahelaḡa taudia, Aaron natuna, ba hamaorodia, idia ta ese ena hanua masena ta latanai e helaḡalaimu karadia ai basine dau kau;

²varavarana mo latadiai: sinana, eiava tamana, eiava natuna, eiava tadikakana,

³eiava taihuna hane-ulato rami-hebou latanai; badina be ia na varavarana, bona asi adavana, ia dainai baine dau kau.

⁴A ena hanua masena ta latanai e helaḡalaimu karadia ai basine dau kau, badina be ia na ena bese lohiana.

⁵Hahelaḡa taudia na kwaradia basie naudia, bona aukidia huidia basie utu heini, bona kopidia basie ivadia.

⁶Edia Dirava enai bae helaḡa; edia Dirava ladana basie hahemaraia. Badina be boubou ḡaudia be idia ese lahi ai e hahelaḡadiamu, Iehova ena, bona edia Dirava ena flaoa idia ese e hahelaḡaiamu; taunabunai idia bae helaḡa.

⁷Idia na ariara hahinedia eiava lebulebu hahinedia eiava diho hahinedia basie adavadia; badina be hahelaḡa tauna na helaḡa, ena Dirava enai.

⁸Oi ese ia ba hahelaḡaia, badina be emu Dirava ena flaoa ia ese baine hahelaḡaia; bena emu ai baine helaḡa, badina be lau Iehova, umui ihahelaḡamui Diravana, na helaḡa.

⁹Hahelaḡa tauna natuna hahinena baine lebulebu, bena ena lebulebu amo ia ese tamana baine hahemaraia, vada bae hamasea lahi ai.

¹⁰Hahelaḡa tauna badana, tadikakana e biagudiamu tauna, dehoro helaḡana e horolaia tauna, e hahelaḡaia dabua helaḡadia baine dokilai tauna, ia ese huina basine ḡiḡi rohoroho, bona ena dabua basine dare.