LEVITIKO 19:2-14

²Israel taudia iboudiai ba hamaorodia, baoto: Umui na ba helaḡa, badina be lau Iehova, emui Dirava, name helaḡa.

³Iboumui ai sinamui bona tamamui ba matauraidia, bona egu dina helaḡadia ba badinadia. Lau binai Iehova, emui Dirava.

⁴Dirava koikoidia basio toma henidia diho, bona dirava laulaudia auri amo basio kara. Lau binai Iehova, emui Dirava.

⁵Emui herohemaino bouboudia, Iehova ena, be mailaidia negadia ai, kara idoidiai ba kara ḡoevaḡoeva, bena baine abimui dae.

⁶Boubou ḡauna hidiona na bavalaia dinana ai eiava dina iharuana ai bavania; dina ihatoina ai bahu na ba haḡolea oho.

⁷Dina ihatoina ai boma ania, una na kara mirona; Iehova ese emui boubou basine abia dae:

⁸ianina tauna baine kerere, badina be Iehova ena ḡau helaḡana vada e hahemaraia; ena bese amo l bae negea daure.

⁹Emui uma anidia ba utu negana ai, basio utua lao ela bona emu inoḡo hetoana korikori ai; bona tano ai bae moru ḡaudia basio gogo.

¹⁰Emu vine anidia danu basio buruki ore, bona vine huahuadia tano ai bae moru be basio gogo: bae mia, ogoḡami tauna ana eiava noho-hedoa tauna ana. Lau binai Iehova, emui Dirava.

¹¹Ḡau ta basio henaoa. Basio kara koikoi. Basio hereva koikoi.

¹²Lau ladagu ai basio gwau hamata koikoi; emu Dirava ladana basio hahemaraia. Lau binai Iehova.

¹³Dekemu tauna basio daḡedaḡe henia, ena ḡau ta danu basio dadia. Ḡaukara tauna ena ḡaukara davana basio dogoa tao ela bona daba ai.

¹⁴Taiakudima tauna basio uduguiraia; mata-kepulu tauna basio hahekwakwanaia; emu Dirava garina ba gari. Lau binai Iehova.