LEVITIKO 17:2-12

²“Arona mai ena natuna tau bona Israela taudia ibounai do oi hamaoroa Lohiabada ena oda be inai:

³Bema Israela tauna ta ese Lohiabada henia totona boromakau tau, o mamoe natuna o nanigosi do ia alaia mase kamepa ena murimurinai,

⁴to Palai Dubu ena iduara dekenai ia mailaia lasi, bona Lohiabada ena vairana dekenai unai boubou ia henia lasi, unai tau ese taravatu ia utua vadaeni. Ia ese rara ia habubua kava dainai, iena bese taudia dekena amo unai tau do lau atoa siri.

⁵“Inai taravatu ena anina be inai: Guna Israela taudia ese edia boubou gaudia be kamepa ena murimurinai idia alaia mase. To hari lau oda inai, idia ese unai boubou gaudia mai mauri danu Lohiabada henia totona, hahelagaia tauna dekenai do idia mailaia, Palai Dubu ena iduara dekenai. Unuseni edia boubou gaudia, Lohiabada danu maino karaia bouboudia do idia alaia mase.

⁶Hahelagaia tauna ese boubou gauna ena rarana do ia abia, Lohiabada ena boubou patana dekenai unai rara do ia negea, Palai Dubu ena iduara kahirakahira, bona boubou ena digara do ia gabua ore, bona unai bonana do ia namo herea lau Lohiabada dekenai.

⁷“Unai dainai Israela taudia ese dirava koikoi gaudia dekenai boubou do idia henia lou lasi. Idia ese unai bamona lau do idia rakatania lou lasi. Inai taravatu be noho hanaihanai taravatuna, idia, bona idia edia natuna, tubuna taudia ibounai edia latanai.

⁸“Do oi hamaorodia danu: Israela tauna ta, o idau bese tauna ta, bema gabua ore boubouna o idau boubouna ta be idau gabuna dekenai do ia alaia mase,

⁹to Palai Dubu ena iduara dekenai ia mailaia lasi, Lohiabada ena boubou gauna totona, unai tau be iena bese dekena amo do lau atoa siri.

¹⁰“Bema Israela tauna ta o idau bese tauna, Israela dekenai ia noho, ese vamu mai ena rara danu do ia ania, lau ese unai tau do lau badu henia, ia be iena bese dekena amo do lau atoa siri.

¹¹Badina be mauri gaudia ibounai edia mauri be rara dainai. Unai dainai lau Lohiabada ese lau oda henia vadaeni rara ibounai be boubou patana dekenai do idia bubua, taunimanima edia kara dika davana do ia karaia totona. Rara be mauri, bona rara ese kara dika ia kokia noho.

¹²“Unai dainai lau Lohiabada ese taravatu badana lau gwauraia inai: Israela taudia, bona edia huanai idia noho idau bese taudia danu ese vamu mai rarana danu do idia ania lasi.