LEVITIKO 14:5-23

⁵Bena hahelaḡa tauna ese baine hahedua, manu ta uro ai bae alaia, e arumu ranuna daenai.

⁶Bena manu maurina bona sida audia bona dabua kakakakana bona muramura avana baine abi, hari e arumu ranuna daenai e alaia manuna rarana ai baine uru diho.

⁷Bena rara baine abia, ena lepra amo baine haḡoevaia; tauna baine nevarilaia, nega hitu; bena baine gwauraia, vada e ḡoeva. A manu maurina baine harohoa lasi murimuri ai.

⁸Bena vada e ḡoeva tauna ese ena dabua baine huri, bona huina idoinai baine naua, bona baine digu: bena baine ḡoeva. Una murinai ia na taruha lalonai baine raka vareai: to ena kalaga murimurinai baine noho ela bona dina hitu bae ore.

⁹Dina ihahituna ai, ia na huina idoinai, kwarana huina bona aukina huina bona ibunina, baine naua; bona ena dabua baine huri; bona baine digu. Unu amo baine ḡoeva.

¹⁰Dina ihataurahanina ai, ia ese mamoe natudia mamaruanedia rua, asi bebeka-bebekadia, bona mamoe natuna hahinena ta, laḡani tamona ḡauna asi bebeka-bebekana, baine abidia. Bona flaoa namo-hereana efa ta baine karoa, karoa gwauta; bena karoa toi baine abi, dehoro ida baine bulo. Bona dehoro kebere ta danu baine abia.

¹¹Bena hahelaḡa tauna ese baine haḡoevaia tauna na baine hakaua lao, mai ena boubou ḡaudia ida, hebou kalagana iduarana ai baine haginia, Iehova vairanai

¹²Bena hahelaḡa tauna ese mamoe natudia mamaruanedia ta baine abia, kara-dika boubouna ai bainela, dehoro keberena danu; unu ḡau ruaosi baine davedia, davedave boubouna ai baela Iehova vairanai.

¹³Hari mamoe natuna maruanena na kara-rea bouboudia ḡaudia bona ḡole-oho bouboudia ḡaudia e aladiamu gabuna ai baine alaia, gabu helaḡana ai; badina be kara-dika boubouna ḡauna na hahelaḡa tauna ana, kara-rea boubouna heḡereḡerena. Ia na helaḡa herea.

¹⁴Bena hahelaḡa tauna ese kara-dika boubouna rarana taina baine abia, e haḡoevaiamu tauna idiba taiana abona baine dahulaia, bona idiba imana sinabadana baine dahulaia, bona idiba aena sinabadana baine dahulaia.

¹⁵Kebere danu baine abia, dehoro taina na miana laurina nuana ai baine seia;

¹⁶bena idiba imana kwakikwakina ta una dehoro ai baine urua diho, bena dehoro na nega hitu baine daveraia Iehova vairanai.

¹⁷Bena dehoro orena miana hahelaḡa tauna imana ai na taina baine abia, e haḡoevaiamu tauna idiba taiana abona bona idiba imana sinabadana bona idiba aena sinabadana baine dahulaidia, kara-dika boubouna rarana e dahulaidia gabudia ai.

¹⁸A dehoro orena hahelaḡa tauna imana ai miana na ibounai e haḡoevaiamu tauna kwarana baine horolaia; unu amo hahelaḡa tauna ese ia dainai herohe-maino karana baine karaia, Iehova vairanai.

¹⁹Hahelaḡa tauna ese kara-rea boubouna ḡauna baine alaia mase, e haḡoevaiamu tauna dainai herohemaino karana baine karaia; murinai ḡoIe-oho mamoena baine alaia mase.

²⁰Hahelaḡa tauna ese ḡole-oho ḡauna bona flaoa boubouna baine gabudia, ihaboulaina patana ai; Iahi ese baine ḡoledia oho. Unu amo hahelaḡa tauna ese una tau dainai herohemaino karana baine karaia, bena ia na baine ḡoeva.

²¹Tau ta bema ogoḡami dainai unu ḡau idavaridia basinema heḡereḡere, ia ese mamoe natuna maruanena tamona mo baine abia, ena kara-dika boubouna, hahelaḡa tauna ese baine davea, ia dainai herohemaino karana baine karaia; bona flaoa efa ta baine karoa, karoa gwauta, karoa toi dehoro ida baine bulo, ena flaoa boubouna; bona dehoro kebere ta;

²²bona kerea rua eiava pune natuna rua, ena moni heḡereḡerena, ta kara-rea boubounabona ta ḡole-oho boubouna.

²³Bena dina ihataurahanina ai, ia ese baine laohaidia, hahelaḡa tauna dekenai, hebou kalagana iduarana ai, Iehova vairanai, hahelaḡa tauna ese baine haḡoevaia totona.