LEVITIKO 14:30-56

³⁰“Unai neganai hahelagaia tauna ese unai kerea manu rua o pune natuna rua, unai tau ena moni hegeregerena gaudia, do ia alaia mase.

³¹Ta be kara dika boubouna totona, ma ta be gabua ore boubouna totona, paraoa boubouna danu. Inai bamona dala dekenai hahelagaia tauna ese unai do ia hagoevaia tauna ena kara dika davana do ia karaia, Lohiabada ena vairana dekenai.

³²Lepera tauna, bema iena moni be hegeregere lasi, ia ese hagoevaia totona gaudia korikori ia hoia diba lasi. Unai bamona tauna durua totona taravatu be inai.”

³³Lohiabada ese Mose bona Arona ma ia hamaoroa, ia gwau,

³⁴“Lau ese umui lau henia, emui tano korikori, ladana Kanana dekenai umui ginidae neganai, sedira ruma ta dekenai lepera gorere do lau atoa.

³⁵“Unai bamona neganai, ruma ena biaguna be hahelagaia tauna dekenai do ia lao, do ia gwau, ‘Lau laloa lepera bamona gorere be egu ruma dekenai ia noho.’

³⁶Vadaeni hahelagaia tauna ese do ia oda henia, ruma gaudia ibounai be ruma dekena amo do idia huaia murimuri dekenai. Bema lasi, sedira hahelagaia tauna do ia raka vareai neganai, ia ese ruma gaudia ibounai do ia gwauraia miro. Vadaeni hahelagaia tauna be ruma do ia raka vareai, ruma do ia itaia.

³⁷“Ia ese gorere toana do ia itaia, bema ruma ena haba be mai ena toutou gadokagadoka o kakakaka, bona bema toutou be haba kopina dekenai sibona lasi, to sisina dobu,

³⁸hahelagaia tauna be ruma ena iduara dekena amo do ia raka murimurinai, bona ruma do ia loka, ela bona dina 7 idia ore.

³⁹“Dina namba 7 dekenai, hahelagaia tauna ese ma do ia lao, do ia itaia, ruma ena haba dekenai toutou ia bada lao o lasi. Bema unai toutou be ia bada lao vadaeni,

⁴⁰hahelagaia tauna ese oda do ia gwauraia, unai haba ena nadi mai edia toutou do idia kokia, hanua ena murimurinai do idia negea, momoru gabuna dekenai.

⁴¹Ruma ena lalona kahana ibounai danu do idia kakasia, bona do idia kakasia lao momoru danu be hanua ena murimurinai do idia negea, miro gaudia idia negea gabuna dekenai.

⁴²“Vadaeni nadi matamatadia do idia abia, idia kokia gaudia edia gabu dekenai do idia atoa. Unai murinai ruma ena lalona kahana ibounai be peni aukana dekena amo do idia penia bona koua.

⁴³“Bema unai nadi idia kokia, bona ruma ena lalona do idia kakasia, bona peni aukana dekena amo idia penia bona koua namonamo murinai unai gorere ena toana ma ia hedinarai lou,

⁴⁴hahelagaia tauna ese do ia itaia lou. Bema unai gorere toana be ia bada lao, ruma ena lalona dekenai, unai be lepera korikori, ia ese ruma ia hadikaia noho, bona unai ruma be ia miro.

⁴⁵“Inai ruma be do idia veria diho, bona iena nadi, iena au, bona iena haba koua peni, be hanua ena murimurinai do idia huaia lao, momoru gabuna dekenai do idia negea.

⁴⁶Daika ese ruma lalonai ia raka vareai, hahelagaia tauna ia loka murinai, ia be do ia miro ela bona dina do ia diho.

⁴⁷Unai ruma dekenai ia hekure, o ia aniani tauna ese iena dabua do ia huria.

⁴⁸“To sedira hahelagaia tauna do ia raka vareai neganai ia itaia, peni auka matamata dekena amo haba idia penia bona koua murinai gorere toana ia hedinarai lou lasi. Unai neganai hahelagaia tauna ese ruma do ia gwauraia goeva, badina gorere be ia ore vadaeni.

⁴⁹Bona unai ruma do ia hagoevaia totona, ia ese manu rua bona sida au maragina ta, varo kakakakana, bona husopo rigina ta do ia abia.

⁵⁰Vadaeni hahelagaia tauna ese manu ta uro ta ena ataiai do ia alaia mase. Uro lalonai be ranu goeva ia noho.

⁵¹Ia ese do mauri manuna do ia abia, sida auna bona varo kakakaka bona husopo rigina danu do ia abia. Inai gau ibounai be ranu goeva ena ataiai ia hamasea vadaeni manu ena rara lalonai do ia atodia diho. Bona unai rara be ruma dekenai do ia negea, nega 7.

⁵²“Inai dala dekenai ia ese ruma do ia hagoevaia, manu ena rarana dekena amo, bona ranu goeva dekena amo, bona ia mauri manuna dekena amo, bona sida auna dekena amo, bona husopo rigina dekena amo, bona varo kakakakana dekena amo.

⁵³“Vadaeni ia mauri manuna be do ia ruhaia, hanua ena murimurinai do ia roho lao, uda dekenai. Unai dala dekenai ia ese unai ruma dekena amo kara dika do ia kokia, vadaeni ruma be ia goeva vadaeni.

⁵⁴“Lepera bona taunimanima edia kopina dekenai idia vara gorere idauidau edia taravatu be inai.

⁵⁵Bona dabua bona ruma dekenai idia noho lepera ena miro ese ia hadikadia taravatu danu.

⁵⁶Bona kopina ia gudu, bona toto, bona kopina toutou, ena kala be idau, ena taravatu danu.