Text copied!
CopyCompare
Buka Helaga - LEVITIKO - LEVITIKO 14

LEVITIKO 14:3-39

Help us?
Click on verse(s) to share them!
3Vadaeni hahelagaia tauna ese lepera tauna kamepa ena murimurina dekenai do ia abia lao, do ia itaia, iena lepera gorere ia ore vadaeni, o lasi.
4“Bema gorere ia ore, hahelagaia tauna ese do ia oda henia, lepera tauna hagoevaia totona manu rua, goeva momokani gaudia, bona mauri gaudia do idia mailaia, sida au maragina ta, bona varo kakakakana ta, bona husopo rigina ta danu do idia mailaia.
5Vadaeni hahelagaia tauna do ia oda, manu ta be uro ena ataiai do idia alaia mase. Uro lalonai be ranu goeva ia noho.
6Hahelagaia tauna ese do mauri manuna do ia abia, sida auna bona varo kakakaka bona husopo rigina danu do ia abia. Inai gau ibounai be ranu goeva ena ataiai ia hamasea vadaeni manu ena rara lalonai do ia atodia diho.
7“Unai rara do ia abia, bona lepera dekena amo do ia hagoevaia tauna dekenai unai rara do ia negea, nega 7, vadaeni ia ese unai tau do ia gwauraia goeva. Bona hahelagaia tauna ese unai do mauri manuna do ia ruhaia, do ia roho lao hanua ena murimurinai, uda dekenai.
8“Vadaeni ia goeva vadaeni tauna ese iena dabua do ia huria, bona iena huina ibounai do ia kakasia ore, bona do ia digu. Unai neganai do ia goeva. Unai murinai ia be kamepa lalonai do ia raka vareai diba, to iena palai ruma ena murimurinai do ia noho ela bona dina 7 idia ore.
9“Dina namba 7 dekenai, ia ese iena huina ibounai, kwarana huina, bona aukina huina bona matana ena ataiai huina do ia kakasia ore lou. Iena dabua do ia huria lou, bona do ia digu. Unai murinai ia be goeva momokani.
10“Dina namba 8 dekenai, mamoe natuna tau rua, toto lasi bona bero lasi gaudia, bona mamoe natuna hahine ta, lagani tamona gauna, toto lasi bona bero lasi gauna do ia mailaia. Bona paraoa namo herea, ena metau kilogaram toi, olive dehoro danu mikisi gauna, bona olive dehoro, ena bada kapusi tamona danu do ia mailaia.
11Hahelagaia tauna ese unai do ia hagoevaia tauna be do ia hakaua lao, mai ena boubou gaudia danu, Lohiabada ena Palai Dubu ena iduara dekenai do ia haginia, Lohiabada ena vairanai.
12“Vadaeni hahelagaia tauna ese mamoe natudia tau ta do ia abia, ia be kara dika boubouna do ia lao, olive dehoro kapusi ta danu. Unai gaudia ruaosi Lohiabada ena vairanai do ia davea. Unai be kerere totona boubouna Lohiabada dekenai ia henia ena toana.
13Hahelagaia tauna ese unai mamoe natuna tau do ia alaia mase gabu helagana ta dekenai, kara dika boubouna bona gabua ore boubouna idia alaia mase gabuna be unai. Unai bamona do ia karaia, badina be kerere totona boubouna be kara dika totona boubouna bamona. Inai boubou ruaosi be hahelagaia tauna ena. Unai dainai inai boubou be helaga herea.
14“Vadaeni hahelagaia tauna ese unai mamoe natuna ena rara haida do ia abia, bona unai do ia hagoevaia tauna ena taia idibana rini atoa gabuna, iena ima kwakikwaki badana idibana, bona iena ae kwakikwaki badana idibana dekenai unai rara do ia atoa.
15“Hahelagaia tauna ese olive dehoro sisina sibona iena imana laurina dekenai do ia bubua.
16Iena ima kwakikwakina idibana be olive dehoro lalonai do ia atoa, bona nega 7 unai olive dehoro haida do ia negea lao, bona lau, Lohiabada ese do lau itaia.
17“Hahelagaia tauna ese iena imana idibana dekenai olive dehoro bona mamoe ena rarana sisina unai do ia hagoevaia tauna ena taia idibana rini atoa gabuna, bona ima kwakikwaki badana idibana, bona ae kwakikwakina badana idibana dekenai do ia atoa.
18Olive dehoro orena, iena imana dekenai do noho gauna, be unai tau ena kwarana dekenai do ia atoa. Inai dala dekenai hahelagaia tauna ese unai tau ena kara dika davana do ia karaia, Lohiabada ena vairanai.
19“Hahelagaia tauna ese kara dika totona boubou gauna do ia alaia mase, unai do ia hagoevaia tauna ena kara dika davana karaia totona, bona iena miro hagoevaia totona. Unai murinai, ia gabua ore totona mamoe boubou gauna do ia alaia mase.
20Hahelagaia tauna ese unai gabua ore gauna bona paraoa boubouna do ia gabua, boubou patana ena latanai, lahi ese do ia gabudia ore. Unai dala dekenai hahelagaia tauna ese unai tau ena kara dika davana do ia karaia, bona unai tau be ia goeva vadaeni.
21“Bema tau ta ia ogogami dainai, unai gaudia ibounai ia hoia diba lasi neganai, ia ese mamoe natuna tau tamona sibona do ia abia, do ia goeva totona. Unai mamoe be iena kerere gwauatao totona boubou gauna. Unai be hahelagaia tauna ese Lohiabada ena vairanai do ia davea, bona unai tau ena kerere davana do ia karaia. Paraoa ena metau kilogaram tamona, bona olive dehoro kapusi tamona danu unai tau do ia mailaia.
22“Manu ta ladana kerea rua o pune natuna rua, iena moni hegeregerena gaudia, danu do ia mailaia, ta be kara dika boubouna, bona ta be gabua ore boubouna.
23“Ia goeva dinadia namba 8 dekenai, unai tau ese inai manu ruaosi Palai Dubu ena iduara dekenai do ia mailaia, hahelagaia tauna ese do ia hagoevaia totona.
24Hahelagaia tauna ese kerere totona mamoe bona olive dehoro do ia abia, bona Lohiabada ena vairanai do ia davea, do ia henia ena toana.
25“Ia ese mamoe do ia alaia mase, bona mamoe ena rarana sisina do ia abia, unai tau ena taiana idibana ena rini atoa gabuna dekenai, iena ima kwakikwaki badana idibana dekenai, bona iena ae kwakikwaki badana idibana dekenai unai rara do ia atoa.
26Hahelagaia tauna ese dehoro haida iena imana laurina dekenai do ia bubua,
27bona iena ima kwakikwakina idibana ta dekena amo unai olive dehoro do ia negea lao, nega 7, bona lau Lohiabada ese do lau itaia.
28“Vadaeni hahelagaia tauna ese olive dehoro, iena imana dekenai do noho gauna do ia abia, unai ia hagoevaia tauna ena taia idibana ena rini atoa gabuna, bona ima kwakikwaki badana idibana, bona ae kwakikwaki badana idibana dekenai unai olive dehoro dekenai do ia dahua, kerere totona mamoe ena rarana ia atoa gabudia.
29To olive dehoro orena, hahelagaia tauna ena imana dekenai do noho gauna, be unai tau ena kwarana dekenai do ia atoa. Inai dala dekenai hahelagaia tauna ese unai tau ena kara dika davana do ia karaia, Lohiabada ena vairanai.
30“Unai neganai hahelagaia tauna ese unai kerea manu rua o pune natuna rua, unai tau ena moni hegeregerena gaudia, do ia alaia mase.
31Ta be kara dika boubouna totona, ma ta be gabua ore boubouna totona, paraoa boubouna danu. Inai bamona dala dekenai hahelagaia tauna ese unai do ia hagoevaia tauna ena kara dika davana do ia karaia, Lohiabada ena vairana dekenai.
32Lepera tauna, bema iena moni be hegeregere lasi, ia ese hagoevaia totona gaudia korikori ia hoia diba lasi. Unai bamona tauna durua totona taravatu be inai.”
33Lohiabada ese Mose bona Arona ma ia hamaoroa, ia gwau,
34“Lau ese umui lau henia, emui tano korikori, ladana Kanana dekenai umui ginidae neganai, sedira ruma ta dekenai lepera gorere do lau atoa.
35“Unai bamona neganai, ruma ena biaguna be hahelagaia tauna dekenai do ia lao, do ia gwau, ‘Lau laloa lepera bamona gorere be egu ruma dekenai ia noho.’
36Vadaeni hahelagaia tauna ese do ia oda henia, ruma gaudia ibounai be ruma dekena amo do idia huaia murimuri dekenai. Bema lasi, sedira hahelagaia tauna do ia raka vareai neganai, ia ese ruma gaudia ibounai do ia gwauraia miro. Vadaeni hahelagaia tauna be ruma do ia raka vareai, ruma do ia itaia.
37“Ia ese gorere toana do ia itaia, bema ruma ena haba be mai ena toutou gadokagadoka o kakakaka, bona bema toutou be haba kopina dekenai sibona lasi, to sisina dobu,
38hahelagaia tauna be ruma ena iduara dekena amo do ia raka murimurinai, bona ruma do ia loka, ela bona dina 7 idia ore.
39“Dina namba 7 dekenai, hahelagaia tauna ese ma do ia lao, do ia itaia, ruma ena haba dekenai toutou ia bada lao o lasi. Bema unai toutou be ia bada lao vadaeni,

Read LEVITIKO 14LEVITIKO 14
Compare LEVITIKO 14:3-39LEVITIKO 14:3-39