Leviticus 9:6-14

⁶Migkaǥi si Moises diyà te kandan te, “Midsuǥù kew te Nengazen te kebaal kayi te kebpemuhat su wey zin ikepezayag diyà te keniyu is gehem din.”

⁷Ne migkeǥiyan din si Aaron te, “Uvey ka ziyà te pemuhatà ne ipemuhat nu is pemuhat he para idlumpiyu wey is pemuhat he edtutungen su wey ka mevelukasi wey is pemilya nu puun te menge salè niw. Ne sumalà te insuǥù te Nengazen, ipemuhat nu zaan is pemuhat te menge etew su wey zan mevelukasi puun te menge salè dan.”

⁸Umbe, mid-uvey si Aaron duen te pemuhatà ne midlapè din sikan is turiti he vaka he pemuhat he para idlumpiyu kandin.

⁹Is lengesa kayi mid-uwit te menge anak din diyà te kandin, ne intiyuk din is tezù din dutun te lengesa, ne impirik din heini ziyà te menge sungeysungey te menge suyuk duen te pemuhatà. Is nesamà he lengesa in-itis din diyà te zizalem duen te pemuhatà.

¹⁰Midtutung din diyà te pemuhatà is menge tavà, is menge vuwà, wey is deisey he vahin te atey, sumalà te insuǥù te Nengazen ki Moises.

¹¹Is usa wey is lundis kayi midtutung din diyà te ǥawas te kampu.

¹²Ne midlapà daan ni Aaron sikan is uyaǥen he pemuhat he edtutungen. Is lengesa kayi, mid-uwit te menge anak din diyà te kandin, ne in-itis din heini ziyà te peliǥuy zuen te pemuhatà.

¹³Mid-uwit dan daan diyà te kandin sikan is sinapù he uyaǥen ragkes is ulu kayi, ne midtutung din heini ziyà te pemuhatà.

¹⁴Midlùluan din is menge parti he ziyà te seled te ǥetek wey is menge paa, ne midtutung din diyà te pemuhatà duma te zuma he parti zuen te uyaǥen.