Leviticus 7:14-29

¹⁴Mebpemuhat sikandin te tigselimbaha ziyà te kada kelasi kayi he supas he gasa ziyà te Nengazen. Ne ǥaked en heini te memumuhat he mibpemirik te lengesa he pemuhat he para te meupiya he kedepità.

¹⁵Is usa te uyaǥen he pemuhat he para te kebpeselamat diyà te Nengazen, kinahanglan he egkeenen te nemuhat wey te pemilya zin wey te menge memumuhat dutun dà te andew te kebpemuhata kayi; kinahanglan he wazà egkesamà kayi zutun te sunud he andew.

¹⁶Emun is pemuhat din para te meupiya he kedepità he ibpemuhat din he para te kedtuman te penaad etawa pemuhat he keugelingen din he suat, is usa kayi egkeenen dutun dà he andew te kebpemuhata zuen. Iyan, emun duen pa egkesamà he usa, egkehimu heini he egkeenen dutun te sunud he andew.

¹⁷Ne emun duen pa maan egkesamà he usa taman te iketelu he andew, kinahanglan en he edtutungen heini.

¹⁸Emun duen egkaan duen te usa zutun te iketelu he andew, ne haazà he pemuhat kenà edewaten te Nengazen ne wazà pulus te kebpemuhata zuen. Ed-isipen heini he utew mezaat ne zuen televaken te minsan hentei he egkaan kayi.

¹⁹Emun ebpekezegkit is usa ziyà te minsan hengkey he mid-isip he meremerik, ne kenè ne heini ereg he egkeenen, ne edtutungen en heini. Is minsan hentei he ed-isipen he lumpiyu, egkehimu he egkaan kayi.

²⁰Piru is minsan hentei he ed-isipen he meremerik he egkaan kayi te usa he para te Nengazen, ne heeyan he etew kenè niw en isipa he zuma niw.

²¹Emun duen ebpezegkit dutun te minsan hengkey he ed-isipen he meremerik, iring te meremerik he menge vutang te etew, etawa meremerik he langgam, etawa minsan hengkey he meremerik, ne egkaan sikandin te usa kayi he pemuhat he para te Nengazen, ne heeyan he etew kenè niw en isipa he zuma niw.

²²Midsuǥù te Nengazen si Moises

²³he keǥiya zin heini ziyà te menge Israilihanen: Kenè kew kaan te tavà te vaka, kerehidu, etawa kambing.

²⁴Is tavà te langgam he ebpatey zà etawa nepatey te zuma he langgam egkehimu he egemiten niw ziyà te minsan hengkey he egemitan niw zuen, piru kenè niw keena.

²⁵Is minsan hentei he egkaan te tavà he egkehimu he ibpemuhat diyà te Nengazen he pemuhat pinaaǥi te hapuy, ne kenè niw en isipa he zuma niw.

²⁶Minsan hendei kew ed-ubpà, ne kenè kew megkaan te lengesa te langgam ragkes en is lengesa te tagbis.

²⁷Is minsan hentei he egkaan te lengesa, ne kenè niw en isipa he zuma niw.

²⁸Mid-uman medsuǥù is Nengazen ki Moises

²⁹he keǥiya zin heini ziyà te menge Israilihanen: Is minsan hentei he ebpemuhat te pemuhat he para te meupiya he kedepità, kinahanglan he mebeǥey sikandin te vahin kayi he pemuhat diyà te Nengazen he iyan ebpekezawat duen is menge memumuhat.