Leviticus 6:19-25

¹⁹Iyan heini migkaǥi te Nengazen diyà te ki Moises

²⁰mehitenged te pemuhat he para te Nengazen he ibpemuhat ni Aaron dutun te andew te kedhimuwa kandin he lavew he memumuhat, he kinahanglan he ed-ul-ulahan daan te menge kevuwazan din he ebpekeilis kandin: Mebpemuhat sikandin te zezuwa he kilu he meupiya he kelasi he herina. Pemuhat heini he para te kebeǥey te zengeg diyà te Nengazen, he layun heini ebeeli taman te taman. Is liwazà kayi ne ipemuhat din ke meselem ne is liwazà wey ke mahapun.

²¹Heini he herina edsehuǥan te lana ne edhilutuen diyà te mevavew he hilutuey. Emun egkelutù en, ebpenevien ne ibpemuhat diyà te Nengazen he iyan pemuhat he para gasa. Is kehemut kayi he pemuhat ebpekepenunuat kandin.

²²Ne kinahanglan he edtutungen heini langun, su heini he pemuhat, ne para te Nengazen, ne ed-ul-ulahan heini taman te taman. Kinahanglan he ed-ul-ulahan heini te kevuwazan ni Aaron he iyan ebpekeilis kandin he egkehimu he memumuhat.

²³Is langun he menge pemuhat he para gasa zutun te memumuhat kinahanglan he pudu edtutunga; kenà heini egkeenen.

²⁴Midsuǥù en maan te Nengazen si Moises

²⁵he egkeǥiyan si Aaron wey sikan is menge anak din he maama kayi he menge sulunuzen: Is pemuhat he para idlumpiyu, kinahanglan he edlepaan diyà te etuvangan te Nengazen diyà te lugar he lepeey te pemuhat he edtutungen. Is pemuhat he para idlumpiyu, utew heini segradu he pemuhat.