Leviticus 6:11-16

¹¹Ne kegkepasad kayi, med-ilis sikandin te visti zin, ne uwita zin haazà is igmuk diyà te ǥawas te kampu, ziyà te lugar he ed-isipen he lumpiyu.

¹²Kinahanglan he kenà ed-ewaan te hapuy haazà is pemuhata; kenà heini ed-evukan. Kada meselem ne edtevunan heini te memumuhat, ne ibpurung din idsavuk dutun te hapuy is pemuhat he edtutungen. Iragkes din daan te edtutung is menge tavà te uyaǥen he pemuhat he para te meupiya he kedepità.

¹³Kinahanglan he kenà ed-ewaan te hapuy haazà is pemuhatà; kenà heini ed-evukan.

¹⁴Iyan heini menge sulunuzen mehitenged te pemuhat he para gasa: Is menge memumuhat he menge kevuwazan ni Aaron iyan ed-uwit kayi he pemuhat diyà te etuvangan te Nengazen diyà te egkesineruwan duen te pemuhatà.

¹⁵Edterinan te memumuhat te sengekemkem heini is pemuhat he herina he zuen duen lana, ne edtutungen din haazà is tinarin din diyà te pemuhatà ragkes is langun he veyewà he insahug dutun te herina. Edtutungen din heini he paaǥi te kedtentenuzi te Nengazen, is kehemut kayi he pemuhat ebpekepenunuat te Nengazen.

¹⁶Is egkesamà he herina, ne edhilutuen ne egkeenen ni Aaron wey te menge memumuhat he menge kevuwazan din. Piru hilutua zan heini he wazè din tapey, ne keena zan diyà te lama te Tulda he Edtelevukaayan, he segradu he lugar. Imbeǥey heini kandan te Nengazen he kandan he vahin duen te menge pemuhat he pinaaǥi te hapuy. Is pemuhat he para gasa utew heini segradu iring te pemuhat he para idlumpiyu wey te pemuhat he vayad te salà.