Leviticus 4:23-30

²³Ne emun egketuenan din en he nekesalè bes sikandin, ne mebpemuhat sikandin te meemahan he kambing he wazè din sazir.

²⁴Pemuhat heini he idlumpiyu kandin. Izampè din is belad din diyà te ulu zutun te kambing, ne lepaa zin haazà diyà te etuvangan te Nengazen, diyà te lugar he lepeey zaan te menge pemuhat he uyaǥen he iyan pemuhat he edtutungen.

²⁵Ne itiyuk te memumuhat is tezù din duen te lengesa te kambing, ne ipalis din haazà duen te menge sungeysungey te menge suyuk duen te pemuhatà te pemuhat he edtutungen. Is egkesamà he lengesa, iitis din diyà te dizalem duen te pemuhatà.

²⁶Ne tutunga zin is langun he tavà diyà te pemuhatà iring ded te ebeelan duen te tavà te ibpemuhat he uyaǥen he pemuhat he para te meupiya he kedepità. Pinaaǥi te kebeeli kayi te memumuhat, egkevelukasan is etew puun te salè din, ne ebpeseyluwen sikandin te Nengazen.

²⁷Emun is sevaha keniyu nekerapas te suǥù te Nengazen he wazè din tivevaa, nekesalà gihapun sikandin.

²⁸Emun egketuenan din en he nekesalè bes sikandin, ne mebpemuhat sikandin te vehiyan he kambing he wazè din sazir he para te salà he neveelan din.

²⁹Izampè din is belad din dutun te ulu zuen te pemuhat he para idlumpiyu, ne lepaa zin heini ziyà te Tulda, zuen te lugar he lepeey te menge uyaǥen he iyan pemuhat he edtutungen.

³⁰Ne itiyuk te memumuhat is tezù din diyà te lengesa zuen te kambing, ne ipalis din haazà diyà te menge sungeysungey te menge suyuk duen te pemuhatà he pemuhat he edtutungen. Ne is egkesamà he lengesa ne iitis din diyà te zizalem duen te pemuhatà.