Leviticus 26:20-32

²⁰Egkehimu he wazà pulus te menge kedhaǥù niw, su is menge tanè niw, kenà ebeǥey te sebpet ne is menge kayu niw ne kenà ebpemeǥas.

²¹Emun ebpedayun kew pa ǥihapun he edsupak kediey su kenè kew ebpemineg kediey, ed-umanan ku pa te kepipitu en maan egketakep he silut keniyu.

²²Edsuǥuen ku ziyà te keniyu is dumezaas he menge langgam ne ebpenhimetayan dan is menge anak niw wey menge uyaǥen niw, ne tenged kayi zeisey zà is egkesamà keniyu he henduen be te wazè en edhiphipanew ziyà te menge zalan niw.

²³Ne emun kenè kew pa ǥihapun ebpemineg kediey, su ebpedayun kew hinuun te kedsupak kedì,

²⁴iyan a mismu egkuntra keniyu ne ebpurungan ku sikiyu edsiluti.

²⁵Ibpesurung ku sikiyu te menge kuntada niw he iyan silut niw tenged te kedsupak niw te kebpekid-uyun ku keniyu. Minsan med-eles kew pa ziyà te inged niw ebpeeǥiyan ku ǥihapun sikiyu te menge kemeresayan, ne tenged dutun egkepeǥes kew he ebpezizalem te gehem te menge kuntada niw.

²⁶Egkurang is keenen niw, umbe sevaha zà he evuwan is egemiten te sepulù he vahi te kedlutù te supas, ne ebevehinen dan pa heini para keniyu. Uya, ebpekekaan kew piru kenè kew egkahantey.

²⁷Ne emun kenè kew pa ǥihapun ebpemineg kediey su ebpedayun kew hinuun te kedsupak kedì,

²⁸ne tenged te pauk ku egkuntrahan ku sikiyu ne edsilutan ku sikiyu te pitu pa maan he takep.

²⁹Ebpeeǥiyan ku sikiyu te vitil ne egkepeǥes kew he egkaan te keugelingen niw he menge anak.

³⁰Edrundusen ku is menge simbahan niw ziyà te metikang he menge lugar ragkes is menge pemuhatà he tutungà te veyewà. Ne idtimbag ku sikiyu is ebpematey ziyà te zivavew te kenà egeǥehinawa he menge ed-ezapen, ne idselikwey ku sikiyu.

³¹Ebengkaǥen ku is menge inged niw wey menge simbahan niw, ne kenà ebpekepenunuat kedì is hemut te menge pemuhat niw.

³²Ebengkaǥen ku is lugar niw ne egkeinuinu zà is menge kuntada niw he edsakup kayi.