Leviticus 25:39-50

³⁹Emun nepubri is duma niw he Israilihanen, he tenged dutun ingkevelegyè din diyà te keniyu is keugelingen din pinaaǥi te kebpeuripen, kenè niw sikandin ibpeterebahu he iring te uripen.

⁴⁰Isipa niw sikandin he sevaha he sinuhulan he terebahanti etawa meǥeliyug he mid-ubpè dà duma keniyu. Edterebahu sikandin diyà te keniyu taman te egkeuma is Tuig te Kebeǥey te Bayàbayà wey Ked-ulì.

⁴¹Dutun he tuig ebpekevayèbayè en sikandin wey is menge anak din, ne ebpekelikù en sikandan diyà te menge kezuzumahi zan ne egkeuman dan en maan egkaangken is menge azen te menge kepuun dan.

⁴²Menge uripen ku sikiyu is menge Israilihanen he impeǥawas ku puun te Ehipto. Umbe kenè niw ivelegyà is keugelingen niw pinaaǥi te kebpeuripen.

⁴³Kenè niw dèdaaǥa is iring niw he Israilihanen he mibpeuripen keniyu. Beeli niw heeyan te kebpekilala he edtehuzen a keniyu is Megbevayè niw.

⁴⁴Emun egkesuat kew he zuen niw menge uripen, ne pemasa kew ziyà te menge nasyun diyà te peliǥuy niw.

⁴⁵Egkehimu zaan ke ziyè kew ebpemasa te emurè niw te inged he kenà menge Israilihanen he mid-ubpà duma keniyu etawa ziyà te sakup te pemilya zan he neetew ziyà te keniyu he lugar. Is menge uripen he egkepemasa niw ziyà te kandan egkehimu en he azen niw,

⁴⁶ne egkehimu ke ibpepengevilin niw te menge anak niw, ebpekepenilbi sikandan kandan seled te tivuuk he untung dan. Piru kenè niw dèdaaǥa is iring niw he Israilihanen he nehimu he uripen niw.

⁴⁷Emun imbelegyà te sevaha he pubri he Israilihanen is keugelingen din pinaaǥi te kebpeuripen te emurù niw te inged he sepian he kenà Israilihanen etawa kezuzumahi zutun te kenè Israilihanen,

⁴⁸ne heeyan he Israilihanen egkehimu pa he edlekaten. Egkehimu sikandin he edlekaten te suled din,

⁴⁹anggam din, id-aǥew zin, etawa minsan hentei he megeget he kezuzumahi zin. Egkehimu zaan ke iyan mismu sikandin edlekat te keugelingen din emun ebpekevaug sikandin.

⁵⁰Is ereg he ebeelan din, ne belensiya zin duma te nekepemasa kandin ke pira en he tuig is kebpenilbi zin wey pira is ereg he ibayad kayi emun ebeyazan sikandin te iring te edhimuwen diyà te sevaha he sinuhulan he terebahanti. Ne itarin din dutun te kentidad is imbayad kandin dutun te kebpemesaha kandin he uripen. (Haazà he kentidad ibasi ziyà te kahabet te menge tuig puun te kebpemesaha kandin taman te Tuig te Kebeǥey te Bayàbayà wey Ked-ulì.) Ne ke pira is egkesamà, ne iyan haazà ebeyazan din para mevelukasi sikandin.