Leviticus 25:21-33

²¹Su edtuvazan ku is tanè niw zutun te ikeenem he tuig para zekelà is egkeraǥun puun duen ne ebpekesustinir te tetelu he tuig.

²²Ne zutun te kebpemula niw te ikewalu he tuig, ne kemulu niw pa egkeena is neraǥun niw zutun te ikeenem he tuig, ne zekelè pa is keenen niw taman te tiraǥun te ikesiyam he tuig.

²³Kenè kew pekid-uyun he kenè niw en ibpahawì te minsan keenu is tanà he imbelegyà diyà te keniyu su heini he tanà kediey; ebpeubpaan ku zà wey ebpeseupan ku zà heini keniyu.

²⁴Umbe, ituǥut niw he mahawì te teǥiǥaked is tanè din puun keniyu. Beeli niw heini ziyà te langun he tanà he nepemasa niw.

²⁵Emun nepubri is duma niw he Israilihanen, he tenged dutun ingkevelegyè din is tanè din, is megeget he kezuzumahi zin iyan medlekat dutun.

²⁶Piru emun wazè din kezuzumahi he edlekat dutun para kandin, egkehimu ǥihapun he egkahawì din heini emun nekaamuy en sikandin te pelata he idlekat kayi.

²⁷Emun egkehitavù heini, ne veyazi zin is nekepemasa te tanè din te vali he ibasi te kahabet te kedraǥun puun dutun te tanà taman te egkeuma is Tuig te Kebeǥey te Bayàbayà wey Ked-ulì te azen, he egkehimu en he egkahawì din is tanè din.

²⁸Iyan, emun kenè pa ereg is idlekat din, ne kenè din pa haazà egkekuwa puun te nemasa taman te kegkeuma te Tuig te Kebeǥey te Bayàbayà wey Ked-ulì. Dutun he tuig egkahawì din en is tanè din he wazà bayad.

²⁹Emun is sevaha he etew ebelegyà te valey zin he ziyà te inged he neliǥuy te verengbeng, egkehimu pa ke edlekaten din heini seled te senge-tuig, puun te timpu te kebelegyè din.

³⁰Piru emun kenè din heini egkelekat seled te senge-tuig, ne haazà he valey egkehimu en he ǥaked te nekepemasa zuen wey te menge kevuwazan din taman te taman. Kenè en heini egkahawì te teǥiǥaked dutun te Tuig te Kebeǥey te Bayàbayà wey Ked-ulì.

³¹Piru is menge valey ziyà te zezeisey he menge inged he wazè din berengbeng iring heini te vevesukà, he egkehimu he edlekaten wey egkahawì dutun te tuig te Kebeǥey te Bayàbayà wey Ked-ulì.

³²Is menge kevuwazan ni Levi egkehimu he edlekat minsan keenu te menge valey zan he ziyà te menge inged he ǥaked dan.

³³Emun kenè dan heini egkelekat, id-ulì heini ziyà te kandan dutun te Tuig te Kebeǥey te Bayàbayà wey Ked-ulì. Su is baley ziyà te menge inged dan kandan he vahin puun te zuma zan he menge Israilihanen.