Leviticus 16:3-22

³Iyan heini insuǥù te Nengazen he veeli ni Aaron dutun te andew he edseled sikandin diyà te Utew Segradu he Lugar: Med-uwit sikandan te turiti he vaka he pemuhat he para idlumpiyu wey meemahan he kerehidu he pemuhat he edtutungen.

⁴Kinahanglan he mebpemeziǥù sikandin ne isul-ub din is bisti he para te lavew he memumuhat he pudu linu: is pendizalem he visti he ebpeketambun te pid-etawan din, is pendivavew he visti, is bakes, wey is tengkulu.

⁵Mebeǥey kandin te zezuwa he meemahan he menge kambing is keet-etawan te Israel he pemuhat he para idlumpiyu wey sevaha he meemahan he kerehidu he pemuhat he edtutungen.

⁶Ibpemuhat ni Aaron haazà is turiti he vaka he pemuhat he para idlumpiyu para mehimu sikandin he lumpiyu wey is menge pemilya zin.

⁷Ne egkuwaan din haazà is dezuwa he kambing ne ed-uwiten din daan diyà te etuvangan te Nengazen, diyà te ǥemawan te Tulda he Edtelevukaayan.

⁸Ne edripa sikandin ke hendei zapit dutun te zezuwa he kambing is para te Nengazen wey is para ki Azazel.

⁹Is kambing he egkeripahan he para te Nengazen, ne pemuhat he para idlumpiyu.

¹⁰Piru is kambing he egkeripahan he para ki Azazel, ibpemuhat din heini he uuyag diyà te Nengazen ne ibpaawè din heini ziyà te sibsivayan, su wey melibri is menge etew puun te menge salè dan.

¹¹Edlepaan ni Aaron sikan is turiti he vaka he pemuhat he para idlumpiyu kandin wey te menge pemilya zin.

¹²Ne egkuwa sikandin te selevukà te veyewà ne ebpenuen din heini te vaǥa he ebpuun diyà te pemuhatà he ziyà te seled te tulda. Ne egkuwa zaan sikandin te zezuwa he kemkem he mehemut he pinu he veyewà, ne ed-uwiten din heini ziyà te Utew Segradu he Lugar.

¹³Ne ziyà te etuvangan te Nengazen, idsavuk din haazà is beyewà duen te hapuy, ne is evel kayi ebpekeeneb duen te tambun te Kavan te Kebpekid-uyun, umbe kenà sikandin ebpatey.

¹⁴Egkuwa sikandin te lengesa zuen te vaka ne edhitindeg sikandin diyà te egkesineruwan duen te Kavan te Kebpekid-uyun te Nengazen he edsinaru ziyà te edsilaan. Ne pinaaǥi te tezù din ebpirikan din te kepipitu sikan is tambun kayi.

¹⁵Edlepaan din daan sikan is kambing he pemuhat he para idlumpiyu te menge etew. Ed-uwiten din is lengesa kayi ziyà te Utew Segradu he Lugar ne ibpirik din duen te tambun te Kavan te Kebpekid-uyun, iring duen te mibeelan din duen te lengesa te vaka.

¹⁶Pinaaǥi kayi te ebeelan ni Aaron, egkelumpiyuwan is Utew Segradu he Lugar te kegkeremeriki zuen tenged te keremerik te menge Israilihanen wey tenged te menge salà dan wey menge kedsupak dan. Ebeelan din daan heini ziyà te zuma he vahin duen te tulda su ziyà man heini mekepelastar te teliwazà te kampu zan te menge meremerik.

¹⁷Kinahanglan he wazà etew he ebpundu ziyà te Tulda zutun te uras te kedseled ni Aaron diyà te Utew Segradu he Lugar taman te egawas sikandin. Emun egkepasad din en te ebaal is tulumanen para melumpiyuwi sikandin, is pemilya zin, wey is tivuuk he keet-etawan te Israel,

¹⁸egawas sikandin duen te Utew Segradu he Lugar ne edhendiyà te pemuhatà he ziyà te ǥemawan te tulda. Ne egkuwa sikandin duen te lengesa zuen te vaka wey kambing he impemuhat ne ibpalis din duen te menge sungeysungey te menge suyuk duen te pemuhatà su wey melumpiyuwi heini.

¹⁹Ne pinaaǥi te tezù din ibpirik din te kepipitu zutun te pemuhatà is duma he lengesa te kebpemuhat kayi ziyà te Nengazen wey te ked-ewaa te keremerik te menge Israilihanen.

²⁰Ne emun egkepasad en ni Aaron te edlumpiyu sikan is Utew Segradu he Lugar wey is duma he parti zuen te tulda ragkes en is pemuhatà, ne ed-uwiten din diyà te teliwazà sikan is uuyag he kambing.

²¹Ne idampè din is dezuwa he velad din diyà te ulu zuen te kambing ne idtug-an din is langun he menge salà wey kedsupak te menge Israilihanen. Pinaaǥi kayi ebpekahalin is menge salè dan diyà te ulu zutun te kambing. Ne ibpepaawà ni Aaron haazà is kambing diyà te sibsivayan te etew he midseriǥan te kebaal kayi.

²²Umbe, ed-uwiten dutun te kambing is langun he salà te menge Israilihanen diyà te sibsivayan.