Leviticus 11:4-28

⁴Tusruktu kowos fah tia kang kosro inge: camel, mweyen el finne sifil kontini ma el kangla, tuh tia sengelik falkal, na pa el tia nasnas nu suwos;

⁵oayapa koni, el finne sifil kontini ma el kangla, tuh tia sengelik falkal, na pa el tia nasnas nu suwos;

⁶rabbit, el finne sifil kontini ma el kangla, tuh tia sengelik falkal, na pa el tia nasnas nu suwos.

⁷Nimet kang pig. Finne sengelik falkal, tuh el tia sifil kontini ma el kangla, na pa el tia nasnas nu suwos.

⁸Nimet kang kain in kosro inge ku pusral mano misa lalos. Elos tia nasnas.

⁹Kowos ku in kang kutena ik ma oasr enga ac unac,

¹⁰tusruktu kutena ma moul ma muta in kof su wangin enga ac unac, fah tiana mongo.

¹¹Kain ma moul ingan nukewa fac tia nasnas nu suwos. Kowos fah tiana kang ma inge ku pusral mano misa lalos.

¹²Kowos fah tiana kang kutena ma su muta in kof uh ma wangin enga ac unac kac.

¹³Kain in won inge ac fah mwe srungayuk nu suwos, ac kowos fah tiana kang: eagle, kain vulture nukewa,

¹⁴buzzard, falcon,

¹⁵kain raven nukewa,

¹⁶ostrich, seagull, kain hawk nukewa,

¹⁷cormorant, kain owl nukewa,

¹⁸pelican, osprey, ibis,

¹⁹stork, heron, hoopoe, ac fak.

²⁰Won srisrik ma orakrak nukewa ma oasr posohksok kac, ma inge tia nasnas,

²¹sayen ma su ku in sro ke nia.

²²Kowos ku in kang srisr in eku, kwot srisrik, ac kain locust nukewa.

²³Tusruktu ma srisrik nukewa saya ma oasr posohksok kac, ac ku pac in orak uh, fah lumweyuk mu tia nasnas nu suwos.

²⁴Ac ma inge ac fah oru kowos in tia nasnas: kutena mwet su pusralla monin ma misa in masrlon ma inge, fah tia nasnas nwe ke ekela.

²⁵Ac kutena mwet su us kutena ipin ma misa inge fah ohlla nuknuk lal, tusruk elos ac tiana nasnas nwe ke ekela.

²⁶Kosro nukewa ma sengelik falka ku tia sifil kontini ma el kangla, ac fah tia nasnas nu suwos. Mwet nukewa su kahl monin sie sin ma inge fah tia nasnas.

²⁷Kosro nukewa ma fahsrkin ye nia ac inpaol, ma inge tia nasnas nu suwos. Kutena mwet su pusral mano misa lun kutena kosro inge fah tia nasnas nwe ke ekela,

²⁸ac mwet se su us mano misa lun ma inge fah ohlla nuknuk lal, tusruk el fah tia nasnas nwe ke ekela. Ma inge tia nasnas nu suwos.