Levitico 16:16-20

¹⁶Siya na ngarud di amagen Aaron ta say malinisan din Kasasantoan ay Kowarto ay kinmadodogis begew sin basbasol ya nankolkolangan din Israelita. Kaman nina abe di masapol ay amagena sin Nasantoan ay Kowarto, tan wada sin gawan di pankamkampoan yo ay maibilang ay kadodogis.

¹⁷Manlogi sin senggepan Aaron sin Kasasantoan ay Kowarto ay mangamag sin seremonia ay manglinis si kadodogis, maiparit ay wada di odom ay ipogaw sin Nasantoan ay Kowarto enggana ay bemelas sisya. Et mo makdeng ay amagena din seremonia ay nay para sin mismo ay awak na, pamilya na ya sin ipogaw,

¹⁸emey sin altar ay panpoppooan si daton et amagena abe di seremonia ay manglinis abe sin altar. Say amagena ngarud et oma sin dadan di napalti ay baka ya kalding et iponas na sin am-in ay kaman sakngod di altar.

¹⁹Isiwsiw na abe din gomot na sin dada et walsiana din altar si mamin pito. Siya sa di amagena ta linisana din altar ay kinmadodogis begew sin basol di ipogaw ta say panbalinena ay nasantoan.”

²⁰“Mo pay ta ikdeikdeng Aaron din seremonia ay manglinis sin Kasasantoan ay Kowarto, din Nasantoan ay Kowarto ya din altar, iey na din matmatago ay kalding sin kad-an di altar ay panpoppooan si daton.