Levii buiↄ 7:9-38

Click on verse(s) to share them!

⁹Pↄ́wɛn gba pↄ́ wà kàa kɛ̀ò ge wà blɛkɛ̀ò oou ge mↄ̀pɛpɛɛwa líↄ dɛ sa'ona pↄ́ sa'òò pↄ́ ũ.

¹⁰Pↄ́wɛn gba pãleↄ líↄ dɛ Aalona buiↄ pↄ́ ũ, aai sɛ sáasaa, tó wa yã̀alɛ ń nísio ge wa kpà nísisain nò.

¹¹Dii sáaukpabↄ pↄ́ waliↄ mↄoɛ̀ yãdilɛaↄn kɛ:

¹²Tó gbɛ̃e lɛ́ mↄ́ Dii sáaukpai ń pↄtuoo, aàli mↄ́ ń kàa sɛsai pↄ́ wa tòto ń nísio lↄ ń kàagbaala pↄ́ wà nísi ɛ̀wào ń kàa pↄ́ wa kɛ̀ ń pɛ̃ɛti yãalɛa ń nísioo.

¹³Aàli mↄ́ lↄ ń pↄ́wɛnti pↄ́ wà ɛsɛ kàu à kɛ̀ pɛ̃ɛ ũo,

¹⁴i pↄ́piↄ bↄ Diiɛ mɛ̀ndodo, i gↄ̃ sa'ona pↄ́ sáaukpa sa'obↄ au lɛ̀ sa'okĩiwaɛ.

¹⁵Wàli sáaukpa sa'onↄↄ so sapi ogↄↄ, wasuli a kĩni tó gu dↄwào.

¹⁶Tó lɛ́gbãdↄa ge gba yã́i à sapi òi, aàli a nↄ̀ↄ so sapi ogↄↄ. Tó gu dↄ̀ a kĩniwa, wa fↄ̃ lí só.

¹⁷Tó sa'onↄↄ gↄ̃̀ e a gↄↄ àaↄ̃de zĩ́, wàli kátɛu à tɛ́kũ.

¹⁸Tó wà sáaukpa sa'onↄↄ sò a gↄↄ àaↄ̃de zĩ́, Dii a sio. Aↄ dɛ sa'oa ũ lↄo. Bↄlↄ ↄ̃ a kɛ̀, a yã́ a wi gbɛ̃́ pↄ́ sò musuɛ.

¹⁹Wasuli sa'onↄↄ pↄ́ kã̀ pↄ́ gbãlɛawa soo. Wàli kátɛu à tɛ́kũ. Sa'onↄↄ sↄ̃, gbɛ̃́ pↄ́ aa gbãlɛaoↄ mɛ́ aali só.

²⁰Tó gbɛ̃́ gbãlɛa sáaukpa sa'onↄↄ sò, wàli ade bↄ a gbɛ̃́ↄ guu. Nↄ̀ↄpiá Dii pↄ́ɛ.

²¹Tó gbɛ̃́ kã̀ pↄ́ gbãlɛawa, gbɛ̃nazĩn gbãlɛa ge nↄ̀ↄ ge pↄpãle pↄ́ dɛ tɛ̃ ũn nò, ↄ̃ à sáaukpa sa'onↄↄ sò, wàli ade bↄ a gbɛ̃́ↄ guu.

²²Dii ò Mↄiziɛ à mɛ̀,

²³aà yã́ɛ bee o Isailiↄnɛ. Ásuli zu ge sã ge ble nísi sóo.

²⁴Àli pↄgɛ ge pↄ́ pↄ́ wài tàitai nísi mↄaokɛ, ãma ásuli sóo.

²⁵Tó gbɛ̃́ pↄtuo pↄ́ wì sa'oò Diiwa, wì a kĩni kátɛu à tɛ́kũ nísi sò, wàli ade bↄ a gbɛ̃́ↄ guu.

²⁶Gu pↄ́ áↄ kuu píi, ásuli bã ge nↄ̀ↄ kòlokpasai sóo.

²⁷Tó gbɛ̃́ kpàa ge pↄ́ kòlokpasai sò, wàli ade bↄ a gbɛ̃́ↄ guu.

²⁸Dii ò Mↄiziɛ à mɛ̀,

²⁹aà yã́ɛ bee o Isailiↄnɛ. Tó gbɛ̃́ mↄ̀ Diiɛ ń sáaukpa sa'obↄo, aàli a sa'obↄpi pↄ́ɛ beeↄ kpa Diiwa.

³⁰Aàli mↄ́ ń a nísi pↄ́ wì ka Diiɛ tɛ́u à tɛ́kũo ń azĩa ↄo ń a kùlao, i a kulapi mↄ Diiɛ.

³¹Sa'ona i a nísi kpasa sa'okĩiwa, kulapi iↄ dɛ Aalona ń a nɛ́ↄ pↄ́ ũ.

³²Àli sáaukpa sa'obↄ ↄplaa gbá go ado sa'ona pↄ́ ũ.

³³Aalona bui pↄ́ sↄ̃̀ Diizi ń sa'obↄpi auo ń a nísio mɛ́ aliↄ a gbápi vĩ a baa ũ.

³⁴Isailiↄ sáaukpa sa'obↄↄ guu, kùla pↄ́ wì mↄ Diiɛ ń a gbá pↄ́ wì bↄ adoao ↄ̃ Dii dìlɛ wàli kpá Aalona ń a nɛ́ↄwa an asea ũ. Isailiↄ líↄ kpámá gↄↄpii.

³⁵Baa pↄ́ Aalona ń a nɛ́ↄ ì e sa pↄ́ wì a pↄ́ nísika Diiɛ tɛ́u à tɛ́kũ guun we. Bee ↄ̃ Dii kpàmá gↄↄ pↄ́ à ń dílɛ a gbàgbanaↄ ũ.

³⁶Gↄↄ pↄ́ wà nísikàmá, Dii dìlɛ Isailiↄnɛ aaliↄ bee kpámá gↄↄpiiɛ an asea ũ e an buiwa.

³⁷Sa pↄ́ wì a pↄ́ kátɛu à tɛ́kũ obↄ yãdilɛaↄn we ń pↄ́wɛn gbao ń duun awakpabↄo ń tàae fĩabobↄo ń daazĩu sa'obↄo ń sáaukpa sa'obↄo.

³⁸Dii yã́pi dà Mↄiziɛ Sinai gbɛ musuɛ gↄↄ pↄ́ a dìlɛ Isailiↄnɛ aa mↄ sa'oiwa Sinai guwaiwaiu.