Levi 9:5-23

⁵E huriki ri bole valai na matana Kape na Vaponga a maka maki e Moses i vakuku ria vona ri gi bole. Muri e huriki lobo ri valai tabukoi ri pesi na matane BAKOVI DAGI.

⁶Lakea e Moses i taki ria, i ta maea, “E BAKOVI DAGI i taki mua mu gu ratea a nihabi, muri bara mu masia a bagetua vona.”

⁷Muri e Moses i takia e Aron i ta maea, “O valai na dede o ratea a nihabi na naro hale vomu, a nihabi gutu-vuro vomu. O rata a nihabi ge rua, ne vona ni kavitagu ioe, ne vona ni kavitagu e huriki, i ramaia a ngava e BAKOVI DAGI i vakuku.”

⁸Lakea e Aron i valai na dede i rabalakia a bulmakau karaba, ra nihabi na naro hale vona.

⁹Muri e huriki e tuna, ri bole valai vona a dara, lakea i lutua a kukulimana na dara, i ravu na tupi i va na dede. Muri i guru tala paru na taruna dede a dara i tababana.

¹⁰Pali i gutu-vuro na dede a vina, a vuanalipi, a kinake i kavitagu a hate, i ramai a ngava e BAKOVI DAGI i vakuku e Moses vona.

¹¹Pali a bobona, a kulina bulmakau i bole tala, i gutu-vuro polovavo na mada.

¹²Muri e Aron i vakalobo a leho nga, i rabalakia tara kanirau ge a nihabi gutu-vuro. E huriki e tuna ri bole a dara ri habi vona, i voro tamali langa na gagana dede i va.

¹³Ri habi vona a mapana, a maka balena kanirau, i gutu-vuro langa na dede.

¹⁴Muri i loi a maka mahalana, a vahana i rua, i gutu langa na dede turana nihabi gutu-vuro.

¹⁵Muri e Aron i bole a nihabi ne huriki, i rabalakia a meme, i habia, ge a nihabi na naro hale ne huriki, i manga a nihabi muga.

¹⁶I bole valai tabu a nihabi gutu-vuro, i habia, i ramaia a nita na vinara.

¹⁷I bole valai tabu a nihabi na vit, i ragamu tala ranga, i gutu-vuro na dede. I gutu turana a nihabi gutu-vuro ni rata na hatelanga.

¹⁸Muri e Aron i rabalaki a bulmakau a sipsip a toga, ge a nihabi na nivalemu ne huriki. Lakea e huriki e tuna ri bole a darana sipsip, a bulmakau, ri habi vona, i voro tamali na gagana dede i va.

¹⁹Pali e Aron i bole a vina sipsip, a bulmakau nga: a vina kuna, a vuanalipi, a kinake i kavitagu a hate.

²⁰I bole a vina i ru langa na siana sipsip, a bulmakau nga, i gutu-vuro na dede.

²¹Pali a siana, a pona bulmakau a sipsip, e Aron i tabari e BAKOVI DAGI vona, i manga a nihabi na nitabari, i ramai a ngava e BAKOVI DAGI i vakuku e Moses vona.

²²Na tahuna e Aron i habi lobo a nihabi na naro hale, a nihabi gutu-vuro, a nihabi na nivalemu, i toto langa a limana ne huriki, i gamai ria. Muri i pea a dede i puru.

²³Muri e Moses e Aron ru dili na Kape na Vaponga. Na tahuna ru pagitala ru gamai e huriki. Muri ri masia a bagetua ne BAKOVI DAGI i bele kavakava.