Levi 7:27-35

²⁷A bakovi a ngatavine i longotaroa a vinara iea, ni gi tono tala na kabu vona.” A Kalavana Kinani ne Vona e Huriki a Prister

²⁸E BAKOVI DAGI i takia e Moses i ta maea,

²⁹“O vakalongo e huriki a Israel o ta maea: A viri i ngaru ni habi a kanirau ge a nihabi na nivalemu, ge ru hereherea tara balena ge vona e BAKOVI DAGI.

³⁰Ra bakovi iea ge bole valai a vina turana siana, ge a nihabi ni gutu na kanono. A prister ge bolea a siana ge tabari e BAKOVI DAGI vona.

³¹A prister ge gutu a vina sipsip, a bulmakau na dede, pali a siana sipsip, a bulmakau ge ne vona e Aron, e huriki e tuna.

³²A pona na kanena ri gi habia na prister, ge manga a sika vona na nihabi na nivalemu ne mua.

³³E rei e tune Aron i rata a nihabi na nivalemu na darana, na vina kanirau, ge bole a pona na kanena kanirau iea.

³⁴Iau e BAKOVI DAGI a bole tala na nihabi na nivalemu ne huriki a Israel a siana, ra ni tabari iau vona, a pona sipsip, a bulmakau, a habi ne Aron a prister, turane huriki e tuna bakovi. E huriki a prister kunana ri gi bole vakaroro ne huriki a Israel a maka kalavana nihabi nga.

³⁵“Ra kalavana nihabi nga, ni bole valai ne BAKOVI DAGI, ge a nihabi ni gutu na kanono. E BAKOVI DAGI i pasivunu a kalavana nihabi nga ne vona e Aron turane huriki e tuna bakovi, na parava ni gamai ria ri gi leho manga a prister vona.