Text copied!
CopyCompare
A Nitana Vure - Levi - Levi 7

Levi 7:2-33

Help us?
Click on verse(s) to share them!
2A sipsip a toga na nihabi na rarenga ni gi rabalaki na tabeke ni rabalaki a kanirau na nihabi gutu-vuro. A darana ni gi voro tamali na gagana dede i va.
3A vina ri gi habi nau na dede turana a vina na kuna, a kinakena,
4a vuanalipi i rua turana a vina, a kinake i kavitagu a hate turana a mahalana ranga.
5A prister ge gutu-vuro a vina nga na dede ge habi nau. Ra sipsip iea a nihabi na rarenga.
6Ra nihabi na rarenga i kiripiripi hateka. E huriki a prister ri kara ni kanina. Ri gi kania na tabeke nitaba.
7A nihabi na rarenga i manga kunana a nihabi na naro hale. A vinara ne rua i taku kunana. A prister i habi a nihabi iea, i kavitagu e huriki vona, ge bole a bobona kanirau, ge kani.
8A prister i rata a nihabi gutu-vuro ne huriki a bakovi, ge bole a kulina ge vona.
9I manga kunana a prister i rata a nihabi na vit ni gutu na oven, na ulo, na ulo kabelabela. Ge bole ge kani.
10A maka nihabi na vit ni vuli, o i uka ma ni vuli turana namona oliv, ge vaveru e huriki e tune Aron.
11“A nita na nihabi na nivalemu turane BAKOVI DAGI i maea:
12“Na tahuna a bakovi i ngaru ni habi a nihabi ni kavurikea e BAKOVI DAGI, ge habi turana a bret i uka is ni vuli turana namona oliv. Ge habi turana a bisket ni ravu na namona oliv, a skon ni vuli kamumu turana a namona oliv.
13Ra nihabi na nivalemu vona, i habi ne vona ni kavurike e BAKOVI DAGI, ge bole ranga bret i tahoka is ge habi turana.
14A bakovi ge bole takutaku na maka nihabi na bret ge habi ne BAKOVI DAGI. Ra bret nga ne vona a prister ra i voro tamali a darana sipsip, a bulmakau ne vona a nihabi na nivalemu.
15Ra bobona sipsip, a bulmakau ni rata a nihabi vona, a bakovi ge kani lobo na parava iea kunana, nahea ge tabuli ranga balena ge palala taho a hini.
16“Pali i tebi a nihabi na bakovi i ngaru ni rata a nihabi ne vona ni ta muholi, o ge habi nau a nihabi na ningaru vona. A bobona sipsip, a bulmakau ni gi kani na parava iea. A bobona ni kani kaleva i kara ni gi kani na parava muri.
17A bobona sipsip, a bulmakau na nihabi ni kani kaleva na parava muri, ni gi gutu na kanono na toluna parava, ge vuro lobo liu.
18A viri i kani a bobona sipsip, a bulmakau ni kani kaleva na toluna parava, na tahuna i habia a nihabi na nivalemu, i uka ma ga ngarua, a vuhuna a nihabi vona i muto na matana Vure. E rei i kania a bobona sipsip, a bulmakau iea i tahoka a ngava.
19“Na tahuna a bobona sipsip, a bulmakau i padoi a maki muto, naha ni kani. Ni gi bole ni gi gutu na kanono ge vuro lobo liu. E huriki ri matapado na matagu ri gi kani ra bobona sipsip, a bulmakau.
20Pali a bakovi i uka ma i matapado, i kania a bobona sipsip, a bulmakau na nihabi na nivalemu ne BAKOVI DAGI, ni gi tono tala na kabu vona.
21A viri i muto na tahuna i padoi a maki i muto na bakovi na ngatavine, a maki i muto na kanirau, a maki i muto na maki i karaka viliha, a maki ranga ri muto ri muma hateka, lakea i kani a bobona sipsip a bulmakau na nihabi na nivalemu ne BAKOVI DAGI, na tahuna i rata mavonga, ia tara ni gi tono tala na kabu vona.”
22E BAKOVI DAGI i takia e Moses i ta maea,
23“O vakalongo e huriki a Israel o ta maea: Naha ni kani a vina bulmakau, a sipsip, a meme.
24Naha ni kani a vina sipsip, a bulmakau i mate tavula, a vina sipsip, a bulmakau i rabalaki a kanirau hateka. Mu bole a vina mu rata a maki ranga vona. Pali naha ni kani.
25A bakovi i kani a vina kanirau, ra i kara ni gi habi ne BAKOVI DAGI manga a nihabi ni gutu na kanono, ni gi tono tala na kabu vona.
26E LeviI uka ma ngi kunana. Naha ni kani a darana maki tara. I vai a tanga mu made vona, naha ni kani a darana kadirovo, a darana kanirau.
27A bakovi a ngatavine i longotaroa a vinara iea, ni gi tono tala na kabu vona.” A Kalavana Kinani ne Vona e Huriki a Prister
28E BAKOVI DAGI i takia e Moses i ta maea,
29“O vakalongo e huriki a Israel o ta maea: A viri i ngaru ni habi a kanirau ge a nihabi na nivalemu, ge ru hereherea tara balena ge vona e BAKOVI DAGI.
30Ra bakovi iea ge bole valai a vina turana siana, ge a nihabi ni gutu na kanono. A prister ge bolea a siana ge tabari e BAKOVI DAGI vona.
31A prister ge gutu a vina sipsip, a bulmakau na dede, pali a siana sipsip, a bulmakau ge ne vona e Aron, e huriki e tuna.
32A pona na kanena ri gi habia na prister, ge manga a sika vona na nihabi na nivalemu ne mua.
33E rei e tune Aron i rata a nihabi na nivalemu na darana, na vina kanirau, ge bole a pona na kanena kanirau iea.

Read Levi 7Levi 7
Compare Levi 7:2-33Levi 7:2-33