Levi 7:14-24

¹⁴A bakovi ge bole takutaku na maka nihabi na bret ge habi ne BAKOVI DAGI. Ra bret nga ne vona a prister ra i voro tamali a darana sipsip, a bulmakau ne vona a nihabi na nivalemu.

¹⁵Ra bobona sipsip, a bulmakau ni rata a nihabi vona, a bakovi ge kani lobo na parava iea kunana, nahea ge tabuli ranga balena ge palala taho a hini.

¹⁶“Pali i tebi a nihabi na bakovi i ngaru ni rata a nihabi ne vona ni ta muholi, o ge habi nau a nihabi na ningaru vona. A bobona sipsip, a bulmakau ni gi kani na parava iea. A bobona ni kani kaleva i kara ni gi kani na parava muri.

¹⁷A bobona sipsip, a bulmakau na nihabi ni kani kaleva na parava muri, ni gi gutu na kanono na toluna parava, ge vuro lobo liu.

¹⁸A viri i kani a bobona sipsip, a bulmakau ni kani kaleva na toluna parava, na tahuna i habia a nihabi na nivalemu, i uka ma ga ngarua, a vuhuna a nihabi vona i muto na matana Vure. E rei i kania a bobona sipsip, a bulmakau iea i tahoka a ngava.

¹⁹“Na tahuna a bobona sipsip, a bulmakau i padoi a maki muto, naha ni kani. Ni gi bole ni gi gutu na kanono ge vuro lobo liu. E huriki ri matapado na matagu ri gi kani ra bobona sipsip, a bulmakau.

²⁰Pali a bakovi i uka ma i matapado, i kania a bobona sipsip, a bulmakau na nihabi na nivalemu ne BAKOVI DAGI, ni gi tono tala na kabu vona.

²¹A viri i muto na tahuna i padoi a maki i muto na bakovi na ngatavine, a maki i muto na kanirau, a maki i muto na maki i karaka viliha, a maki ranga ri muto ri muma hateka, lakea i kani a bobona sipsip a bulmakau na nihabi na nivalemu ne BAKOVI DAGI, na tahuna i rata mavonga, ia tara ni gi tono tala na kabu vona.”

²²E BAKOVI DAGI i takia e Moses i ta maea,

²³“O vakalongo e huriki a Israel o ta maea: Naha ni kani a vina bulmakau, a sipsip, a meme.

²⁴Naha ni kani a vina sipsip, a bulmakau i mate tavula, a vina sipsip, a bulmakau i rabalaki a kanirau hateka. Mu bole a vina mu rata a maki ranga vona. Pali naha ni kani.