Levi 7:1-13

¹E BAKOVI DAGI i takia e Moses ta maea, “A nihabi na rarenga i kiripiripi hateka. A vinara na nihabi iea i maea:

²A sipsip a toga na nihabi na rarenga ni gi rabalaki na tabeke ni rabalaki a kanirau na nihabi gutu-vuro. A darana ni gi voro tamali na gagana dede i va.

³A vina ri gi habi nau na dede turana a vina na kuna, a kinakena,

⁴a vuanalipi i rua turana a vina, a kinake i kavitagu a hate turana a mahalana ranga.

⁵A prister ge gutu-vuro a vina nga na dede ge habi nau. Ra sipsip iea a nihabi na rarenga.

⁶Ra nihabi na rarenga i kiripiripi hateka. E huriki a prister ri kara ni kanina. Ri gi kania na tabeke nitaba.

⁷A nihabi na rarenga i manga kunana a nihabi na naro hale. A vinara ne rua i taku kunana. A prister i habi a nihabi iea, i kavitagu e huriki vona, ge bole a bobona kanirau, ge kani.

⁸A prister i rata a nihabi gutu-vuro ne huriki a bakovi, ge bole a kulina ge vona.

⁹I manga kunana a prister i rata a nihabi na vit ni gutu na oven, na ulo, na ulo kabelabela. Ge bole ge kani.

¹⁰A maka nihabi na vit ni vuli, o i uka ma ni vuli turana namona oliv, ge vaveru e huriki e tune Aron.

¹¹“A nita na nihabi na nivalemu turane BAKOVI DAGI i maea:

¹²“Na tahuna a bakovi i ngaru ni habi a nihabi ni kavurikea e BAKOVI DAGI, ge habi turana a bret i uka is ni vuli turana namona oliv. Ge habi turana a bisket ni ravu na namona oliv, a skon ni vuli kamumu turana a namona oliv.

¹³Ra nihabi na nivalemu vona, i habi ne vona ni kavurike e BAKOVI DAGI, ge bole ranga bret i tahoka is ge habi turana.