Levi 5:11-18

¹¹“Pali na tahuna a bakovi ge uka a moni ni kona a balu ge rua, ge bole vilia a kilo na plaoa ge taku, ne vona a naro hale i ratea. Nahea ge ru a namona oliv o ge ru a havu mangisipa vona, a vuhuna ra plaoa iea a nihabi na naro hale.

¹²Ge bole lakea na prister, ge ragamu tala ranga, a nihabi iea ge ratea e BAKOVI DAGI ge luhoia. Lakea a prister ge gutu na dede a plaoa popote nga, turana a nihabi na maki ni kani ni gutu na kanono ne vona e BAKOVI DAGI. Ra plaoa iea a nihabi na naro hale.

¹³I mavonga a prister ge rata a nihabi ne vona ni kavitagu a bakovi iea, lakea a naro hale vona ni gi puga vuroki. A plaoa i tababana, ge bole a prister, i manga a nihabi na vit.”

¹⁴E BAKOVI DAGI i takia e Moses i ta maea,

¹⁵“Na tahuna a bakovi tara i longokaburungi ni habi a maki ni taba ne BAKOVI DAGI, i manga a hini i taki ge habi, i rata a naro hale. Ra bakovi iea ge bole vilia a sipsip a toga, ge habia ne BAKOVI DAGI ge vakaloboa a naro hale vona. A prister ge takia vona a mapana sipsip ge konea vona ge ramaia a mapana maki ni kona na mailo na Vure. Muri a bakovi iea ge bole vilia na prister tara sipsip a toga, a mapana ge maea.

¹⁶Ra maki ni taba i uka ma i habi muga ne BAKOVI DAGI, ngane ge habi ge ru langa tabu ranga ( ). Muri a prister ge habia a sipsip iea ge a nihabi na rarenga, ge kavitagua a bakovi iea, lakea a naro hale vona bara ni puga vuroki.

¹⁷“A bakovi tara bara i putu puru ruru a vinara ne BAKOVI DAGI, pali i uka ma i lohoka vona, ra bakovi iea i rata a naro hale, bara i tahoka a ngava.

¹⁸Lakea ge bole lakea na prister a tuna sipsip a toga ge gavutuvutu. A prister ge takia i riva a mapana, ge a nihabi na rarenga. Lakea a prister ge kavitagua a bakovi iea na hini i rata ruru a naro hale, lakea a naro hale vona bara ni puga vuroki.