Levi 4:14-33

¹⁴Muri na tahuna ri matakilaka vona a naro hale ne ria, ri gi bole lakea na matana Kape na Vaponga tara bulmakau karaba a toga, ge a nihabi na naro hale ne ria.

¹⁵Na matane BAKOVI DAGI, e huriki a gare na vaponga ri gi ru langa a limane ria na gina bulmakau, muri ri gi rabalakia na matane BAKOVI DAGI.

¹⁶Muri a prister ni gamai ge bole dili na Kape na Vaponga ranga darana,

¹⁷ge lutua na dara a kukulimana, ge voro tamali balaka polorua na matane BAKOVI DAGI tabukoi na kala dagi i naviri mule a Tabeke Nitaba Hateka.

¹⁸Ge lakea na dede i pesi na matane BAKOVI DAGI pololilo na Kape na Vaponga, ge ravu na maka tupina dede ranga dara. A darana bulmakau a toga i tababana, ge bole paru, ge guru na taruna dede na nihabi gutu-vuro na matana Kape na Vaponga.

¹⁹Muri ge bole a vina lobo, ge gutu na dede,

²⁰ge rata manga a naro i ratea na nihabi na naro hale vona. I mavonga kunana a prister ge rata a nihabi ge kavitagu ria, lakea bara ni puga vuroki a naro hale ne ria.

²¹Muri ge bole talea a bulmakau a toga iea na mada, ge gutua na kanono, i manga a hini i gutu muga a bulmakau na naro hale vona. Ra bulmakau e huriki a Israel ri habia, a nihabi na naro hale ne ria.

²²“Na tahuna a matakari tara i rata ruru a naro hale, i putu puru a vinara ne BAKOVI DAGI, a Vure vona, ra naro i ratea, i tahoka a ngava vona.

²³Muri ge matakilaka vona a naro hale i ratea, ge bolea tara meme a toga ge gavutuvutu, ge a nihabi.

²⁴Na matane BAKOVI DAGI ge ru langa a limana na gina meme, muri ge rabalakia na hini ni rabalaki a maka kanirau ne vona a nihabi gutu-vuro. Iea a nihabi na naro hale.

²⁵Muri a prister ge lutua na darana meme iea a kukulimana, ra nihabi na naro hale, ge ravu na maka tupina dede na nihabi gutu-vuro. Muri ge bole paru a dara i tababana, ge guru na taruna dede.

²⁶Muri ge gutu a vina meme iea na dede, ge manga a naro i ratea na nihabi na nivalemu. I mavonga kunana a prister ge rata a nihabi ne vona ni kavitagu a matakari iea, a naro hale vona ni gi puga vuroki.

²⁷“Na tahuna a bakovi tavula tara i rata ruru a naro hale, i putu puru a vinara ne BAKOVI DAGI, ra naro i ratea, i tahoka a ngava vona.

²⁸Na tahuna i matakilaka vona a naro hale i ratea, ge bole vilia tara meme a kinana ge gavutuvutu, ge a nihabi na naro hale vona.

²⁹Ge ru langea a limana na gina meme iea, ra nihabi na naro hale, muri ge rabalakia na tabeke ni gutu a nihabi gutu-vuro.

³⁰Muri a prister ge lutua na darana meme a kukulimana, ge ravu na maka tupina dede na nihabi gutu-vuro, ge bole paru a dara i tababana, ge guru na taruna dede.

³¹Ge bole tala a vina meme lobo, ge manga a naro ni bole tala a vina na nihabi na nivalemu, ge gutu na dede. Na tahuna e BAKOVI DAGI i burongi a mangina kinani, bara i vivi. I mavonga kunana a prister ge kavitagua a bakovi iea, a naro hale vona ni gi puga vuroki.

³²“A bakovi bara i habia tara tuna sipsip ge a nihabi na naro hale, ge bolea a sipsip a kinana ge gavutuvutu.

³³Ge ru langea a limana na gina sipsip, ra nihabi na naro hale, muri ge rabalakia na hini ni rabalaki a maka kanirau ne vona a nihabi gutu-vuro.