Levi 27:21-34

²¹Na tahuna a Pida na Nihabimule a Maki ge bele, a bakovi i konea a malala iea ge habia ne BAKOVI DAGI. Lakea ra malala iea ge tabuli ga malala nau liu, bara habia ne huriki a prister.

²²“Bara bakovi i habia ne BAKOVI DAGI a hania i konea, i uka ma a tabeke na malala ne tubuna,

²³a prister ge gi kadolu i riva a pida i tababana ge bele vona a Pida na Nihabimule a Maki. Ge takia a mapana malala ge harena vona a pida iea. Na pida iea kunana ge habia na prister a mapana malala. Ra mapana malala i malamala na matane BAKOVI DAGI.

²⁴Na Pida na Nihabimule a Maki, a bakovi ge habi mulea na tahona a malala vona.

²⁵A mapana maki nga ni gi pasi ramai a moni na mailo ne BAKOVI DAGI.

²⁶“Na tahuna mu habia ne BAKOVI DAGI a kanirau, naha ni bolea a tabua na kanirau, a vuhuna a tabua na maka kanirau ne BAKOVI DAGI. A tabua na bulmakau a sipsip, ngi ranga ne BAKOVI DAGI.

²⁷Pali bara tabua i podea a kanirau i muto, mu konamulea na mapana i takia a prister, mu ru langa tabu ranga ( ). Na tahuna a bakovi i marikoi ni konamulea a kanirau, a prister ge takia tara viri ge konea na mapana i takia.

²⁸“Na tahuna a bakovi i ru herea tara maki ge ne vona e BAKOVI DAGI, i manga a bakovi, a ngatavine, a kanirau, a malala i bolea ne tubuna, nahea ge takia tara bakovi ge konea, ia tara i uka ma ge konamulea na prister, a vuhuna i malamala hateka a maki ni taba ne BAKOVI DAGI.

²⁹“A bakovi ni ru here ni gi ratapile, nahea ni gi kona mule, ni gi rabalaki.

³⁰“A maki ni kani ni varo na hania, i manga a vuana vit, a vutuna kai, mu ru kadolu na galesi ge ravulu. Muri mu habia nau e BAKOVI DAGI, a galesi ge taku i malamala na matagu.

³¹Bara bakovi tara i ngaru ni kona mule ranga maki ni kani nga, ge konamulea na mapana, ge ru langa tabu ranga ( ).

³²Bara o tahoka a sipsip o a bulmakau i ravulu, o ru herea ge taku, ge malamala lakea ne BAKOVI DAGI.

³³Ra kanirau o habia nau i kamumu o i hale, naha ni kuloia. Pali bara o kuloia ra kanirau nga, rua varago ru malamala, i uka ma ni gi kona mule.”

³⁴A vinara nga e BAKOVI DAGI i habi ne Moses na lolo e Sinai, ge longo e huriki a Israel, ri gi ramai.