Levi 27:2-28

²ge taki e huriki a Israel, ge ta maea, “A viri i ta muholi ge habi ranga viri lakea nau, ge habi na prister ranga moni ge vakatorea a nita muholi vona.

³Ge pasia a mapana bakovi o ngatavine vona ge maea: a bakovi i tahoka a pida i ravulu rua, i harena na pida i ravulu polotara (60), ni gi kona na moni silva i 50, i ramai a nimavana moni na mailo ne BAKOVI DAGI.

⁴A ngatavine i tahoka a pida i ravulu rua, i harena na pida i ravulu polotara (60), ni gi kona na moni silva i 30.

⁵A viri i tahoka a pida i lima, i harena na pida i ravulu rua, a bakovi ni gi kona na moni silva i 20. A ngatavine ni gi kona na moni silva i ravulu.

⁶A koma i tahoka a keva i taku, i harena na pida i lima, a koma bakovi ni gi kona na moni silva i lima. A koma ngatavine ni gi kona na moni silva i tolu.

⁷A viri a pida vona i rangi a pida i ravulu polotara (60), a bakovi ni gi kona na silva moni i 15. A ngatavine ni gi kona na silva moni i ravulu.

⁸Na tahuna a bakovi i ratea a nita tora iea, i uka moni ge kona mule ia, o ge kona mule a turana, a bakovi iea ge lakea na prister. A prister ge kali purua a mapana bakovi iea, bara i kara ni kona.

⁹“Bara bakovi i ta muholi ge habia ne BAKOVI DAGI tara kanirau ge a nihabi, ge habia a kanirau ra a taki mua vona ta mu gu habia. A kanirau maea mu habia ni taba.

¹⁰Ra bakovi iea, nahea ge kuloia a kanirau ge habia nau a viri nabatabuna. Nahea ge kuloia a kanirau nabatabuna ge habia nau a viri gavutuvutu. Ia ge rata mavonga, ra kanirau varago nga bara ne nau kunana.

¹¹A kanirau i muto nahea ni gi habi ne BAKOVI DAGI. A kanirau maea ni gi bole lakea taro na prister.

¹²A prister ge masia a kanirau iea i muto o i kaba, ge takia a mapana. Ra mapana nahea ni gi pulo.

¹³A bakovi iea i ngaru ge konamulea ra kanirau iea, ge konamulea na moni i takia a prister, ge ru langa tabu ranga ( ).

¹⁴“Bara bakovi i habi a ruma vona i malamala lakea ne BAKOVI DAGI, a prister ge matai taroa a ruma iea i kamumu o i hale, lakea a prister ge takia a mapana. Ra mapana nahea ni gi pulo.

¹⁵Bara bakovi iea ge ngaru ni konamulea, ge habi nau a mapana ruma, ge ru langa tabu ranga ( ).

¹⁶“Bara bakovi i habi ne BAKOVI DAGI a tabekena malala na kabu vona, a prister ge matai kamumua a malala, ge riva a vutuna vit ni gi varo vona a malala iea. A malala iea i kara ni gi varo vona a vutuna vit ge ravulu rua a kilo vona, a mapana malala iea ge a moni silva i ravulu lima (50).

¹⁷Bara i habia nau na Pida na Nihabimule a Maki, a mapana ge tabuli mavonga, nahea ni gi pulo lae.

¹⁸Pali ia ge habia nau muri na Pida na Nihabimule a Maki, a prister ge gi palupu a maka pida ri tababana, ge bele na pida ni vakoli, ge kali purua a mapana malala iea.

¹⁹Bara bakovi i habi a malala vona nau, ia ge ngaru ni konamulea a malala iea, ge konamulea na mapana i takia a prister, ge ru langa tabu ranga ( ).

²⁰Bara i uka ma i konamulea nau a malala iea, o i habia na bakovi tara i konea, ra malala iea i uka ma ni gi kona mule na tahuna a Pida Nivakoli i valai tabu.

²¹Na tahuna a Pida na Nihabimule a Maki ge bele, a bakovi i konea a malala iea ge habia ne BAKOVI DAGI. Lakea ra malala iea ge tabuli ga malala nau liu, bara habia ne huriki a prister.

²²“Bara bakovi i habia ne BAKOVI DAGI a hania i konea, i uka ma a tabeke na malala ne tubuna,

²³a prister ge gi kadolu i riva a pida i tababana ge bele vona a Pida na Nihabimule a Maki. Ge takia a mapana malala ge harena vona a pida iea. Na pida iea kunana ge habia na prister a mapana malala. Ra mapana malala i malamala na matane BAKOVI DAGI.

²⁴Na Pida na Nihabimule a Maki, a bakovi ge habi mulea na tahona a malala vona.

²⁵A mapana maki nga ni gi pasi ramai a moni na mailo ne BAKOVI DAGI.

²⁶“Na tahuna mu habia ne BAKOVI DAGI a kanirau, naha ni bolea a tabua na kanirau, a vuhuna a tabua na maka kanirau ne BAKOVI DAGI. A tabua na bulmakau a sipsip, ngi ranga ne BAKOVI DAGI.

²⁷Pali bara tabua i podea a kanirau i muto, mu konamulea na mapana i takia a prister, mu ru langa tabu ranga ( ). Na tahuna a bakovi i marikoi ni konamulea a kanirau, a prister ge takia tara viri ge konea na mapana i takia.

²⁸“Na tahuna a bakovi i ru herea tara maki ge ne vona e BAKOVI DAGI, i manga a bakovi, a ngatavine, a kanirau, a malala i bolea ne tubuna, nahea ge takia tara bakovi ge konea, ia tara i uka ma ge konamulea na prister, a vuhuna i malamala hateka a maki ni taba ne BAKOVI DAGI.