Levi 26:9-24

⁹“Iau bara rata kamumu mua, a habi ne mua e huriki e tune mua ri ala kupo. Bara vakatorea a ngava dagi a takia ne mua hosi.

¹⁰A maki ni kani mu mirio na pida muga, bara i tabuli i harena na pida muri. A maki mu kani kaleva, bara mu vuroki tala, mu bole a maki ni kani karaba, mu ru na murine ria.

¹¹Iau ga made na mailo nau na kurukurune mua, i uka ma ga ngalahere ne mua.

¹²Ga laho turane mua, ge iau a Vure ne mua, mua ge mua e huriki a tara nau.

¹³Iau e BAKOVI DAGI a Vure ne mua. Hosi mua a vorakato o Egipto ni vakavora hateka, muri a tuli tala mua vonga, a taparaki valai mua koea, lakea i uka ma ge mua a vorakato tabu ne ria. A ratapilea a nitora na bakovi i vakavora hateka mua, ngane mu laho na pesivahane mua.

¹⁴“Pali mua mu longotaro a ngavagu i uka ma mu ramai a vinara nau,

¹⁵mu putu puru a vinara nau, mu ngalahere na ngavagu, mu longotaro a ngava dagi a rata turane mua,

¹⁶bara vakamadihi mua maea: bara vakamangenge hateka mua, a habi a gilanga dagi ne mua, ra gilanga iea bara i rata a kuline mua i rongo, bara mu kepa, ge ratea a kakaine mua i malosi. Bara mu varo a maki ni kani na hania, pali i uka ma mu gu kani a kanena, a vuhuna e huriki a pile bara ri valai, ri kani a maki mu varo.

¹⁷Iau bara iau a pile ne mua. E huriki a pile bara ri valai, ri vaubi turane mua, ri ratapile mua, ri matakari mua. Na tahuna i uka viri ge valili ne mua, bara mu mangenge tavula mu ha.

¹⁸“Muri na tahuna a vakamadihi mua na naro nga, pali i uka ma mu ramai tabu a ngavagu, bara vakamadihi hateka mua.

¹⁹Bara ratapile a tagenga, a nitora ne mua. A vala i uka ma ge boru, a malala bara i tora manga a kedo.

²⁰A maki ni kani i uka ma ri gi koru rike na hania, a maka kai i uka ma ri gi vua. A tuhakanga ne mua bara i lobo tavula.

²¹“Na tahuna a maka maregoa nga ri bele ne mua, pali mu tababana ni tagege, bara luhoi a maka naro hale mu rata, a habi mua a maregoa hale, i dagi hateka na maregoa muga.

²²Ga rudu a maka livoa hateka ri gi lakene ri gi rabalaki e huriki e tune mua, a maka bulmakau ne mua, ga rata mua mu ala popote, i uka viri ge laho na dala ne mua.

²³“Muri na tahuna a vakamadihi maea mua, i uka ma mu longototo a nitagu, mu tababana ni tagege,

²⁴bara luhoi a naro hale ne mua, a ratapile mua hateka tabu.