Levi 25:2-13

²ge taki e huriki a Israel, ge ta maea, “Na tahuna mu made pali vona a malala a habia ne mua, na poloruana pida lobo naha ni varo a maki ni kani na hania. Ge tabuli tavula a malala. A malala ge malo, ge manga a hini mu malo na Parava Nimalo. Mu rata mavonga, mu togoa a pida iea, a vuhuna a pida ne BAKOVI DAGI.

³Na pida i polotara mu varo a maki ni kani, mu puri kamumu a rahana vain, mu ru kadolu a kanena maki ni varo na hania.

⁴Pali na poloruana pida naha ni leho vona a malala, ge malo. Pali ra pida iea a pida ne BAKOVI DAGI. Naha ni varo a maki ni kani, naha ni puri a rahana vain ne mua.

⁵Naha ni mirio a vit i rike tavula, naha ni pasi a kanena vain i uka ma ni puri a rahana. Mu mata taro ge tabuli, a vuhuna na pida iea a malala ge malo.

⁶Pali na pida iea a maki ni kani ri rike tavula na malala ne vona ni kani kunana. I uka ma ne vona ni ru palupu, o ni gi rata a vain vona. Mua, turana a vora ne mua, e huriki a mosi, mu kani.

⁷A maka bulmakau, a sipsip, a meme, a kanirau ri tegi, ria ranga ri gi kani.

⁸“Balaka polorua mu gi a pida ge polorua, ge bele na pida i ravulu va a polona i polova (49).

⁹Muri na ravuluna parava na poloruana keva, mu pupu a tavure na tabeke lobo na robo ne mua. Ra parava iea a parava dagi ni kavitagu e huriki.

¹⁰A pida i ravulu lima (50) ge vakatubu na tahuna mu vaki a tavure vona, ra pida iea a pida ne BAKOVI DAGI. Mu vakalongo e huriki vona a maregoa ne ria i lobo ngane, ri gi made kamumu. Na pida iea a viri i kona a malala na bakovi tara, ge habi mulea na tahona, o ge habi mulea na hamona tara. E huriki a vora ri gi pe a tahone ria, ri gi hamule mai a kabu ne ria.

¹¹Ra ravulu limana pida (50th), a pida ne huriki lobo ri gi made kamumu ri gi vivi. Na pida iea naha ni varo a maki ni kani na malala ne mua, naha ni bole a vit i rike tavula, naha ni pasi a kanena vain na rahana i uka ma ni puri.

¹²Mu luhoi kamumu, ra pida iea, a pida ni vaki a tavure, a pida nau kunana. Mu kani kunana a maki i rike tavula na malala ne mua.

¹³“Na Pida na Nihabimule a Maki iea mua e huriki mu habi a malala ni kona, mu bole mule a malala ne mua.