Levi 23:4-16

⁴“Ngane ga taki mua vona a maka parava dagi e BAKOVI DAGI i vulaki, mu gu rata a habu vona. Na pida lobo mu vapopo vona a parava nga, mu vasileki.

⁵Na parava ravulu a polona i va (14th) na mugana keva, ge vakatubu na haro i rolo, mu ratea a Habu na Nipagepolo.

⁶Na parava ravulu a polona i lima (15th) na keva iea kunana, a Habu na Bret I Uka Is mu vakatubua. Na parava ge polorua mu kani a bret i uka ma ni vuli turana a is.

⁷Na mugana parava na vik mu vapopo mu kavurike iau, naha ni rata a leho mu rata na parava vakaroro.

⁸Mu rata a nihabi ni gutu na kanono ne BAKOVI DAGI na parava ge polorua. Na poloruana parava mu vapopo tabu, mu kavurike iau. Na parava iea naha ni rata a leho mu rata bala.”

⁹E BAKOVI DAGI i takia e Moses,

¹⁰ge taki e huriki a Israel, ge ta maea, “Na tahuna mu vano mu made vona a malala iau a habia ne mua, mu mirio a vit, mu bole lakea na prister a galesi na vit mu rotu muga.

¹¹Na parava muri na Parava Nimalo, a prister ge tabari e BAKOVI DAGI vona a nihabi nga, bara i ngaru mua.

¹²Na parava mu tabaria a nihabi na vit, mu habi turana a tuna sipsip ge gavutuvutu, ge tahoka a pida i taku, ge a nihabi gutu-vuro ne BAKOVI DAGI.

¹³Mu bole a kilo na plaoa ge rua, mu vuli turana a namona oliv, ge a nihabi na vit ni gutu na kanono ne vona e BAKOVI DAGI. Mu habi turana a nihabi ni gutu-vuro, i manginoro a mangina. Mu bole a lita na vain ge taku, ge a nihabi na vain, mu habi turana a nihabi nga i rua.

¹⁴Pali mua, i uka ma mu bole valai nau, iau a Vure ne mua, a galesi na vit nga, naha ni kani a vit mu bole karaba na hania. Na tahuna mu habi pali, ngane mu kara ni kani a bret i uka is, o ni vuli turana a is. Ra vinara nga, ge ramai vakaroro e huriki a hamone mua muri ma.

¹⁵“I tubu na parava muri na Parava Nimalo, ra parava mu tabari iau vona a galesi na vit, mu gi a vik ge polorua.

¹⁶Mu gi a parava ge ravulu lima, muri na vik i polorua ge lobo, mu habi tabua a nihabi na vit karaba ne BAKOVI DAGI.