Levi 23:36-44

³⁶Na parava lobo na vik iea mu ratea a nihabi ni gutu na kanono ge lakea ne BAKOVI DAGI. Na polotoluna parava mu vapopo tabu mu kavurike iau, mu ratea a nihabi tara ni gutu na kanono ge lakea ne BAKOVI DAGI, mu vakaloboa a habu iea. Na parava iea naha ni rata a leho mu rata na parava vakaroro.

³⁷“Iau a vulaki a parava nga, ge ria a habu ne BAKOVI DAGI. Mu vapopo mu vasileki, mu habi a nihabi ni gutu-vuro, a nihabi na vit, a nihabi na vain, a nihabi ranga na parava nga.

³⁸Ra nihabi nga ni rata langa tabu na nihabi na Parava Nimalo ne BAKOVI DAGI, ranga maki mu habi nau, a nihabi na nita muholi, turana a nihabi na ningaru ne mua.”

³⁹E BAKOVI DAGI i taki tabua e Moses na Habu na Kape, i ta maea, “Na parava ravulu a polona i lima na keva polorua, muri kunana ne mua mu mirio, mu ratea a habu ne BAKOVI DAGI na parava ge polorua. Na mugana parava, na polotoluna parava na habu mu malo, naha ni leho.

⁴⁰Na mugana parava mu bole ranga kanena kai kamumu, a pagana niuniu, a rahana kai i paga bolabola, a rahana kai i paga madilidili, mu pitei na matane BAKOVI DAGI na parava ge polorua.

⁴¹Na pida lobo na poloruana keva mu rata a habu ne BAKOVI DAGI na parava ge polorua. E huriki a hamone mua, ria ranga ri gi ramaia a vinara iea.

⁴²Mua a tahotanga o Israel mu made na kape na hania na parava ge polorua,

⁴³lakea e huriki a hamone mua bara ri lohoka vona a tahuna a tuli tala mua o Egipto mu valai koea, mu made na maka kape kiroko maea. Iau e BAKOVI DAGI, a Vure ne mua, a takia a ngava iea.”

⁴⁴E Moses i longo a ngava nga, i vakalongo e huriki a Israel vona a maka habu i vulaki e BAKOVI DAGI.