Levi 23:19-30

¹⁹Mu bolea tara meme a toga, mu rata a nihabi na naro hale. A sipsip a toga ge rua, a pida ne rua ge taku, ge a nihabi na nivalemu.

²⁰A prister ge bole a maki nga ge tabari e BAKOVI DAGI vona, turana a bret ni rata na vit i moro muga. Ra nihabi nga, a maki nau kunana, bara habi ne huriki a prister.

²¹Na parava mu ratea a nihabi iea, mu vapopo mu vasileki. Naha ni rata a leho mu rata bala vona a parava iea. E huriki a hamone mua ri bele muri ma, na hini vai ri made vona, ri gi ramai vakaroroa a vinara iea.

²²“Na tahuna mu mirio a vit na malala ne mua, naha ni bole a vit na harena hania. Naha ni hamule tabu ni poi a masigo. Ge tabuli vonga ngi, ge bole e huriki a matasia, e huriki a mosi. Iau e BAKOVI DAGI a Vure ne mua, a takia a ngava iea.”

²³E BAKOVI DAGI i takia e Moses

²⁴ge taki e huriki a Israel, ge ta maea, “Na mugana parava na poloruana keva naha ni leho, mu malo. Na tahuna mu longo a nangina tavure, mu vapopo mu vasileki.

²⁵Na parava iea naha ni rata a leho mu rata vakaroro, pali mu bole a nihabi ni rata na kanono mu habi nau.”

²⁶E BAKOVI DAGI i takia e Moses,

²⁷“Na ravuluna parava na poloruana keva, mu vapopo mu ratea a habu ni kavitagu e huriki. Na parava iea mu vapopo, mu vasileki. Mu peremu ni kani, mu habi a nihabi ni gutu na kanono ne BAKOVI DAGI.

²⁸Naha ni leho vona a parava iea, a vuhuna ia a Parava na Nikavitagu. A prister ge rata a nihabi ni kavitagu mua na matane BAKOVI DAGI a Vure ne mua.

²⁹A viri i uka ma i vakaperemua na parava iea, bara ni lili tala na kabu vona.

³⁰E rei a bakovi i rata a leho vona a parava iea, bara ratapilea.