Levi 22:6-23

⁶bara i muto mavonga i harena na malunga liu. Muri ge hilolo kamumu taro na naru, ge kani a nihabi ni habi nau. Ia i uka ma i hilolo, nahea ge kani.

⁷Muri na haro i rolo, bara i matapado, ge kani a nihabi ni taba, a vuhuna a maki ni kani ri habi nau, ne vone ria e huriki a prister.

⁸Nahea ge kani a bobona sipsip, a bulmakau i mate tavula o i rabalakia a kanirau hateka. Na tahuna i kani a bobona, bara i muto na matagu. Iau e BAKOVI DAGI, a takia a ngava iea.

⁹“E huriki a prister ri gi ramai lobo a maka vinara a habi ne ria. Ria i uka ma ri ramai a vinara, bara ri tahoka a ngava, a rabalaki ria. Iau e BAKOVI DAGI, a gamai ria ge ria a prister nau, a takia a ngava iea.

¹⁰“E huriki a bakovi tavula nahea ri gi kani a maka nihabi ni taba. E huriki a mosi, a vora na prister, ngi ranga nahea ri gi kani.

¹¹Pali a vorakato i konea a prister ge vona, o ni poda na tabeke vona, i kara ge kani a maki ni kani i bole a prister.

¹²Bara prister i tahoka e tuna a ngatavine, i parangi a bakovi tavula, i uka ma ia a prister, ra ngatavine iea nahea ge kani a maki ni kani ni gamai.

¹³Pali ra ngatavine iea ge mate e girihina o ni pile, i uka e tuna, i hamule lakea ne tamana i made turana, ra ngatavine iea i kara ni kani a maki ni kani na prister. Pali e huriki a bakovi tavula, i uka ma ri gi kania.

¹⁴“A bakovi tavula i kani ruru a maki ni kani ni gamai, ge koli lakea na prister a maki i kani, ge ru langa tabu ranga.

¹⁵E huriki a prister ri gi matadoko, nahea tara bakovi tavula ge kani a maki ni kani ni taba, ma ri gi rata hale a nihabi ne huriki a Israel ri habi ne BAKOVI DAGI.

¹⁶Bara ri mata taroa tara bakovi tavula i kani a maki ni kani ni taba, ra bakovi iea i tahoka a ngava, ge koli a maki ni kani na prister, a vuhuna iau kunana e BAKOVI DAGI a rata ria ri malamala.”

¹⁷E BAKOVI DAGI i takia e Moses,

¹⁸“O taki e Aron, e huriki e tuna, turane huriki a Israel. Na tahuna a bakovi tara ne mua, a mosi tara i made turane mua, i habi a nihabi gutu-vuro ne vona ni vakaloboa tara nita muholi i takia ne BAKOVI DAGI, o na ningaru vona kunana,

¹⁹ge bolea tara bulmakau, a sipsip, o a meme, ge a toga ge gavutuvutu, lakea bara ngarua a nihabi vona.

²⁰Pali na tahuna i habi nau a maki nabatabuna, bara pile, i uka ma ga ngaru.

²¹A bakovi i ngaru ni habi ne BAKOVI DAGI a nihabi na nivalemu ne vona ni vakalobo a nita muholi vona, o ge habi na ni ngaru vona kunana, ge bolea tara sipsip o a bulmakau, ge gavutuvutu. Ia bara i rata mavonga, bara ngarua a nihabi vona.

²²Naha ni habia ne BAKOVI DAGI a sipsip, a bulmakau i kepa, i maputu a vahana, i tekiteki, i tahoka a ngarava. Naha ni habi na dede a kanirau maea, ge a nihabi ni gutu na kanono lakea ne BAKOVI DAGI.

²³Na tahuna mu habi a nihabi na ningaru ne mua kunana, mu bole a sipsip, a bulmakau i laho puru rike, i uka maki. Pali naha ni habi nau a sipsip, a bulmakau maea ge vona a nihabi na nita muholi. I uka ma ga ngarua.