Levi 19:22-37

²²A prister ge bolea a sipsip iea, ge rata a nihabi na rarenga na matane BAKOVI DAGI, ge kavitagua a bakovi iea, na naro hale i ratea. Lakea a naro hale vona bara ni puga vuroki.

²³“Na tahuna mu lakea na malala e Kenan, mu varo a maka kai i vona a kanena. Pali naha ni kani a kanena kai na pida ge tolu.

²⁴Na vana pida mu habi ne BAKOVI DAGI a maka kanena kai, ne vona ni kavurike iau vona.

²⁵Na limana pida mu kani a maka kanena kai. Mua bara mu ramai a maka ngava nau, a maka kai ne mua bara ri vua kupo. Iau e BAKOVI DAGI a Vure ne mua, a takia a ngava iea.

²⁶“Naha ni kani a bobona kanirau i vona a dara. Naha ni rata a malulu legelege.

²⁷“Naha ni pali a ivu na tabalane mua, naha ni palakudu ge kapo a ivu na sivane mua.

²⁸“Naha ni tolo a kuline mua na tahuna a viri i mate, naha ni siri a kuline mua. Iau e BAKOVI DAGI a takia a ngava iea.

²⁹“Naha ni ramai a narone huriki ri kavurike a vure ranga, ri mata taro e tune ria ngatavine ge ria a ngoi. Bara mu rata mavonga, mu ha taro iau, mu ramai a maka vure ranga, a maka naro hale bara ri bele kupo na tanga ne mua.

³⁰“Naha ni leho na Parava Nimalo. Mu rata kamumua mu togoa a mailo nau. Iau e BAKOVI DAGI a takia a ngava iea.

³¹“Na tahuna mu ngaru a niluhoi kamumu, naha ni lakea ne huriki a bakovi na malulu, a bakovi na muto. Bara mu rata mavonga, mu muto na matagu. Iau e BAKOVI DAGI a Vure ne mua, a takia a ngava iea.

³²“Mu rata kamumu mu togo e huriki a gare. Mu mangenge nau, a Vure ne mua. Iau e BAKOVI DAGI a takia a ngava iea.

³³“Naha ni rata hale e huriki a mosi ri made na malala ne mua.

³⁴Mu rata kamumu ria, i manga a hini mu rata kamumu a bakovi o Israel. Mu ngaru ria i manga a hini mu ngaru mule mua, a vuhuna hosi mu made manga a mosi o Egipto. Iau e BAKOVI DAGI, a Vure ne mua, a takia a ngava iea.

³⁵“Na tahuna mu rovai a maki, mu guru dili a maki, mu gi a maki ge kona e huriki, naha ni ta tami.

³⁶Mu rovai kamumu, mu guru kamumu, mu gi kamumu a maka maki. Iau e BAKOVI DAGI a Vure ne mua, a tuli tala mua na robo o Egipto, a takia a ngava iea.

³⁷“Iau e BAKOVI DAGI a Vure ne mua, a vakuku mua mu gu longototo a maka vinara nau, a nitagu.”