Levi 19:13-29

¹³“Naha ni rata hale a viri mu gu panaho a maki vona. Na tahuna mu taki a viri ge rata a leho ne mua, mu kona liu ia na parava iea. Naha ni nugu mule a mapana, mu gu habi kuduvi.

¹⁴“Naha ni harogi a viri i vou. Naha ni ru na dala a maki, ge sibo vona a kepa ge boru. Mu mangenge vona a Vure ne mua. Iau e BAKOVI DAGI, a takia a ngava iea.

¹⁵“Na tahuna mu varamai na ngava, mu rata a naro kamumu na nipelekado a ngava. Naha ni tuhori a matasia, o go mangenge na bakovi na mahala. A ngava mu rata ge malamala kunana.

¹⁶“Naha ni laho viliha ni padimomo a turamu. A bakovi tara ni vakapesi na ngava ni gi pelekado, pali ra ngava ni padi virihi ia vona i uka ma i muholi, mu ta tala mu tuhoria. Bara mu ngavarubu, bara ni rabalaki tavula a bakovi iea. Iau e BAKOVI DAGI, a takia a ngava iea.

¹⁷“Na tahuna a viri i rata hale ioe, naha ni mata robo vona. O pelekado a ngava muru vatahate vona. Ma go ru mavongea na niluhoi vomu a ngava muru vatahate vona, bara o dili na naro hale.

¹⁸“Naha ni koli a naro hale na viri i rata virihi ioe vona, naha ni tepu vakaroroa. O ngaru e huriki a turamu, i manga a hini o ngaru mule ioe. Iau e BAKOVI DAGI a takia a ngava iea.

¹⁹“Mu ramai a maka vinara nau. Naha ni mata taroa a sipsip ge radia a meme, ge vakabele a tuna. Naha ni varo palupu na hania ge taku a vutuna maki legelege. Naha ni rodo a nirodo i uka ma ni rata na maki i taku.

²⁰“Na tahuna a bakovi i mahita turana a vorakato ngatavine, ni taki ta ni gi habi na bakovi tara ge konea ge matukapaga, pali ra bakovi iea i uka ma i konea ma, mu tuli rua lakea na tabeke ni vapelekado. Muri ni gi vakamadihi rua. Pali naha ni rabalaki rua, a vuhuna ra ngatavine iea, i uka ma ni vakamatukapaga ma.

²¹A viri i mahita turana a vorakato ge lavea tara sipsip a toga, ge bole lakea na matana Kape na Vaponga, ge a nihabi na rarenga.

²²A prister ge bolea a sipsip iea, ge rata a nihabi na rarenga na matane BAKOVI DAGI, ge kavitagua a bakovi iea, na naro hale i ratea. Lakea a naro hale vona bara ni puga vuroki.

²³“Na tahuna mu lakea na malala e Kenan, mu varo a maka kai i vona a kanena. Pali naha ni kani a kanena kai na pida ge tolu.

²⁴Na vana pida mu habi ne BAKOVI DAGI a maka kanena kai, ne vona ni kavurike iau vona.

²⁵Na limana pida mu kani a maka kanena kai. Mua bara mu ramai a maka ngava nau, a maka kai ne mua bara ri vua kupo. Iau e BAKOVI DAGI a Vure ne mua, a takia a ngava iea.

²⁶“Naha ni kani a bobona kanirau i vona a dara. Naha ni rata a malulu legelege.

²⁷“Naha ni pali a ivu na tabalane mua, naha ni palakudu ge kapo a ivu na sivane mua.

²⁸“Naha ni tolo a kuline mua na tahuna a viri i mate, naha ni siri a kuline mua. Iau e BAKOVI DAGI a takia a ngava iea.

²⁹“Naha ni ramai a narone huriki ri kavurike a vure ranga, ri mata taro e tune ria ngatavine ge ria a ngoi. Bara mu rata mavonga, mu ha taro iau, mu ramai a maka vure ranga, a maka naro hale bara ri bele kupo na tanga ne mua.