Levi 18:7-28

⁷“Naha ni mahita turane kinamu. Bara o rata mavonga, o vakamaruhu e tamamu.

⁸“Naha ni mahita turana a ngatavine i parangi tabu vona e tamamu. Bara o rata mavonga, o vakamaruhu e tamamu.

⁹“Naha ni mahita turane kurabamu, o e tune tamamu ngatavine, o e tune kinamu ngatavine. Ra ngatavine nga e kurabamu. I made na ruma vomu, o i made na tabeke tara, ia e kurabamu kunana.

¹⁰“Naha ni mahita turana e tubumu ngatavine, re tune tumu bakovi a ngatavine, e tune tumu ngatavine a ngatavine. Ra naro iea bara i rata ioe o maruhu hateka.

¹¹“Naha ni mahita turane tune girihine tamamu ngatavine, a vuhuna ia e tune tamamu. Ra ngatavine iea e kurabamu.

¹²“Naha ni mahita turana e kurabane tamamu, a vuhuna ia e balomu.

¹³“Naha ni mahita turana e kinamu tara, a vuhuna ia a viri vomu.

¹⁴“Naha ni mahita turana e girihine tamamu tara, a vuhuna ra ngatavine iea e kinamu. Bara o mahita turana, o rata e tamamu tara i maruhu.

¹⁵“Naha ni mahita turana e girihine tumu bakovi, a vuhuna ia e kamu.

¹⁶“Naha ni mahita turana e girihine turamu, a vuhuna ia e kua vomu. Ioe bara o rata mavonga, bara o vakamaruhu e turamu.

¹⁷“Naha ni mahita turana a ngatavine, turana e tuna a ngatavine. Naha ni mahita turana e tubumu, a vuhuna ia e tubumu. A naro iea i muma hateka.

¹⁸“Naha ni parangi tabu e tarine girihimu na tahuna i tababana ni mahuri e girihimu, ma go rata rua ru gu vatahate mule ne rua. Ra naro iea i uka ma i kamumu.

¹⁹“Naha ni mahita turana a ngatavine i matai a keva, a vuhuna na tahuna iea i muto.

²⁰“Naha ni mahita turana e girihina bakovi i made tabukoi vomu, bara o rata mavonga o muto.

²¹“Naha ni habi e tune mua ne Molek. Bara mu rata mavonga, mu vakahale a rana Vure ne mua. Iau e BAKOVI DAGI a takia a ngava iea.

²²“Naha ni mahita turana a bakovi tara i manga a naro ni mahita turana ngatavine. Ra naro iea i muma hateka.

²³“Naha ni tari a ligo, a boro, a maki maea. A ngatavine tara nahea ge rata mavonga. Ra naro iea i muma hateka, i rata a viri i muto na matagu.

²⁴“Naha ni rata a maka naro hale nga, ma mu gu muto na matagu. E huriki i uka ma ri lohoka na Vure muholi, ri made na robo e Kenan, ri rata a maka naro hale nga, ri muto na matagu. I mavonga a vakatubu ni lili tala ria, mu gu bole a malala ne ria.

²⁵A naro hale ne ria i ratea a malala iea i muto. Lakea a rata halea a malala ne ria, i marikoi ne ria, i lua tala ria.

²⁶Pali mua turana e huriki a mosi ri made turane mua, mu ramai a maka vinara nau a habi ne mua. Naha ni ramai a narone huriki ri made muga na robo iea, a vuhuna a narone ria i mavuru hateka, a marikoi vona.

²⁷Mu lohoka vona e huriki ri made muga vona a robo iea, a narone ria i mavuru, i ratea a malala i muto.

²⁸Naha ni rata mavonga. Mua bara mu rata mavonga, a malala bara i lua tala mua i manga a hini i lua tala e huriki ri made muga vonga.