Levi 17:3-12

³Na tahuna a bakovi tara i habi a bulmakau, a tuna sipsip, a meme pololilo o polovavo na mada,

⁴pali i uka ma i bole vilia na matana Kape na Vaponga, ge habia manga a nihabi ne BAKOVI DAGI na matana mailo vona, i putu puru a vinara, i vakatua a dara, i tahoka a ngava. Ni gi tono tala na kabu vona.

⁵Ra vinara iea i ta pupukari ne huriki a Israel nahea ri gi rabalaki a sipsip, a bulmakau, ri gi rata a nihabi polovavo na mada. Ri gi bole a sipsip, a bulmakau ri gi lakea na matana Kape na Vaponga, ri gi rata a nihabi na nivalemu turane BAKOVI DAGI.

⁶Muri a prister ge bolea a darana sipsip, a bulmakau, ge voro tamali na gagana dede tabukoi na matana kape, ge gutu na dede a vina sipsip, a bulmakau. Na tahuna e BAKOVI DAGI i burongi a mangina bara i vivi.

⁷Pali nahea ri gi habi tabu a nihabi na meme taua. Na tahuna ri rata mavonga, ri manga a ngoi, ri mata here ne BAKOVI DAGI ri kavurike viliha a vure ranga. Ra maka vinara nga ge tabuli tora turane ria, e huriki a hamone ria bara ri ramai vakaroro muri ma.

⁸“O taki ria e rei tara ne ria, o a mosi tara i made turane ria, i ngaru ni habi a nihabi ni gutu-vuro,

⁹pali i uka ma i taparaki lakea na matana Kape na Vaponga ni gi habi ne BAKOVI DAGI, bara ni tono tala na kabu vona.

¹⁰“E rei tara ne ria na kabu ne Israel o a mosi tara i made turane ria, i rabalakia a kanirau, i ninu o i kani a darana, bara iau a pile vona, ni gi lili tala na kabu vona.

¹¹A dara i habi a nimahuri ne huriki a bakovi, a kanirau, i mavonga a taki maea mua. A prister ge guru na dede a darana kanirau, ne vona ni kavitagu a nimahuri vona, a vuhuna a dara kunana a maki ge kavitagu e huriki ri gi mahuri.

¹²I mavonga e BAKOVI DAGI i taki e huriki a Israel, nahea tara ne ria, o a mosi tara i made turane ria, ge kani a bobona maki i vona a dara.