Levi 14:7-56

⁷Muri ge voro tamali balaka polorua langa na bakovi i vona a patala a dara. A prister ge vakalongoa i matapado pali, muri ge bole talea a kadirovo mahuri ge vakabebea.

⁸“A bakovi i ngaru ni matapado, ge vahilolo a varakia vona, ge ali vuroki a vuna na kakaina, ge hilolo ge matapado. Muri bara i dili valai na mada, pali bara i made polovavo taro na kape vona na parava ge polorua.

⁹Na poloruana parava ge ali vuroki lobo a maka vuna na kakaina, a vungana na matana, a karirana. Ge hilolo, ge loi a maka kala vona, muri bara i matapado.

¹⁰“Na polotoluna parava ge bole a tuna sipsip a toga ge rua ge gavutuvutu, a sipsip a kinana ge gavutuvutu a pida vona ge taku, a kilo na plaoa kamumu ge tolu ni vuli turana namona oliv ge a nihabi na vit. Ge bole turana a kikei na namona oliv.

¹¹A prister ge tulia a bakovi iea turana a maka nihabi vona, ge lakea na matana Kape na Vaponga na matane BAKOVI DAGI.

¹²“A prister ge bolea tara sipsip turana a kikei na namona oliv, ge a nihabi na rarenga. Muri ge tabari e BAKOVI DAGI vona, ge manga a nihabi.

¹³Muri a prister ge rabalakia a tuna sipsip na tabeke ni rabalaki a sipsip, a bulmakau na nihabi na naro hale, na nihabi gutu-vuro. A prister ge rata mavonga, a vuhuna ra nihabi iea a nihabi na rarenga, i manga kunana a nihabi na naro hale. Ra nihabi nga ni gamai hateka ne vona e huriki a prister kunana.

¹⁴A prister ge bole ranga darana sipsip ge ravu polotano na talingana kanena bakovi. Ge bole tabu ranga ge ravu na kukukoru na limana a vahana a kanena.

¹⁵Muri a prister ge bole a namona oliv ge guru langa na bolana limana a maurina.

¹⁶Muri ge lutua na namona oliv iea a kukulimana a kanena, ge voro tamali balaka polorua na matane BAKOVI DAGI.

¹⁷I ranga namona oliv i tababana ni gi ravu na talingana kanena bakovi ra ni vakamatapado, na kukukoru na limana kanena, na kukukoru na vahana kanena, polomeli na dara na nihabi na rarenga.

¹⁸A namona oliv i tababana na limana, a prister ge ravu na gina bakovi ta ni gi vakamatapado, ge kavitagua na matane BAKOVI DAGI.

¹⁹Muri a prister ge habi a nihabi na naro hale, ge kavitagua a bakovi ge matapado. Muri ge rabalakia a tuna sipsip ne vona a nihabi gutu-vuro.

²⁰Muri ge habia a sipsip, a bulmakau iea na dede, turana a nihabi na vit, ge kavitagua a bakovi iea, ge matapado.

²¹“Pali a bakovi i uka moni ni kona a maki ge a nihabi ni vakamatapado mule ia, ge bolea tara tuna sipsip a toga, ge a nihabi na rarenga. Muri a prister ge bolea, ge tabari rike e BAKOVI DAGI vona, ne vona ni kavitagua a bakovi iea. A bakovi ge bolea a kilo na plaoa kamumu ge taku, ge vuli turana a namona oliv, ge rata a nihabi na vit. Ge bole turana a kikei na namona oliv ge rua.

²²Ge bole valai a balu ge rua, a vuhuna i uka moni ni kona a sipsip. A balu muga, ge a nihabi na naro hale, a balu muri ge a nihabi ni gutu-vuro.

²³“Na polotoluna parava, ge bole lakea na prister na matana Kape na Vaponga a balu nga, na matane BAKOVI DAGI, ne vona ni vakamatapado ia.

²⁴A prister ge bolea a tuna sipsip ne vona a nihabi na rarenga, turana a namona oliv, ge tabari e BAKOVI DAGI vona.

²⁵A prister ge rabalakia a tuna sipsip iea, ge ratea a nihabi na rarenga. Ge bole a dara popote na sipsip, ge ravu na talingana bakovi, ra talingana a kanena. Ge bole ranga, ge ru tabu na kukukoru na limana a kanena, na vahana a kanena.

²⁶A prister ge bole a namona oliv ge guru langa na bolana limana a maurina,

²⁷ge lutua a kukulimana a kanena na naruna oliv iea, ge voro tamali balaka polorua na matane BAKOVI DAGI.

²⁸Muri a prister ge ravu a namona oliv na talingana a kanena bakovi, na kukukoru na limana a kanena, na kukukoru na vahana a kanena. A naro iea ge ratea na tabeke ni ru a darana sipsip na nihabi na rarenga.

²⁹A namona oliv ranga i tababana, ge ravu na gina bakovi i ngaru ia ge matapado. Na naro iea, a prister i rata a nihabi ne vona ni kavitagu a bakovi iea na matane BAKOVI DAGI.

³⁰A prister ge bole a balu nga i rua i bole valai a bakovi ge a nihabi,

³¹ge habia tara ge a nihabi na naro hale. A viri tara ge a nihabi gutu-vuro, turana a nihabi na vit. Na naro iea, a prister i kavitagua a bakovi iea na matane BAKOVI DAGI, ra i ngaru ni matapado.

³²Ra vinara iea a vinara na viri i tahoka a patala, pali i uka moni ni kona a nihabi na nivakamatapado.”

³³E BAKOVI DAGI i taki e Moses e Aron,

³⁴“Muri bara mu vano mu made na malala e Kenan, ra malala a habia ne mua, ge ne mua liu. Na tahuna mu made pali o Kenan, ga ratea a limuta ge tuvu na ruma tara,

³⁵lakea a tahona ruma i masia a maki iea i bele na ruma vona, ge lakea na prister, ge vakalongoa vona a limuta i bele na ruma vona.

³⁶Muri a prister ge vakukua a tahona ruma ge bole tala na ruma a maki lobo vona, ma ge muto. Muri a prister ge dili ge lei a ruma.

³⁷Ge lei kamumua a maki i vakahale a gagana ruma. Na tahuna i matai a maki gomagoma i vururu ri rata a maka dupi kiroko pololilo na gagana ruma,

³⁸a prister ge pagitala ge tukaria a hinebi, ge vakalongoa vona a ruma ge mata kopu na parava ge polorua.

³⁹Na poloruana parava a prister ge hamule ge lei kamumu tabua a ruma. A maki iea ge rako lae na gagana ruma,

⁴⁰a prister ge vakuku ria ri gi puka vuroki a maka kedo i rako ne ria a limuta, ri gi vuroki na lovo na lulu polovavo na tanga dagi.

⁴¹Ri gi haruri vuroki a maka simen ni kavitagu a gaga vona pololilo na ruma, ri gi bole tala tabu ri gi vuroki na murina lulu polovavo na tanga.

⁴²Muri ri gi bole a maka kedo karaba ri gi kuloi a maka kedo ri vuroki, ri gi kapi tabua a gagana ruma. Ri gi bole a simen karaba, ri gi pipikari tabu a murina a hini ni haruri vuroki a simen hale vona.

⁴³“Na tahuna a limuta ge bele tabu na gagana ruma, muri ne ria ri rata a maka leho nga,

⁴⁴a prister ge hamule tabu na ruma ge lei tabua. A maki iea i rako lae, i vakahale a ruma. A ruma iea i muto.

⁴⁵Lakea ri gi pukea a ruma, ri gi vuroki a maka kedo, a simen, a kai. Ri gi kaloho tala na tanga dagi, ri gi vuroki na murina lulu.

⁴⁶A bakovi tara i dili vona a ruma ni tukari, a bakovi iea i muto, bara i muto mavonga i harena na malunga liu.

⁴⁷E rei a viri i kani o i mahita vona a ruma iea, ge vahilolo a maka varakia vona.

⁴⁸“Na tahuna a prister i valai ge matai a ruma, i matai a gagana ruma i kamumu, i uka ma i tuvu vona a limuta, ge taki ria vona a ruma i matapado, a vuhuna a limuta ta ge ratapile a ruma i uka ma i bele tabu.

⁴⁹A naro ni rata kamumu a ruma ge matapado na matana Vure i maea: A prister ge bole a kadirovo ge rua, a mavilana kai a sida, a mota vururu, a rahana kai a hisop.

⁵⁰I ranga e huriki ri gi bolea a ulo ri gi kiru a naru, ri gi bole vilia. A prister ge bole langea na ulo a kadirovo tara, ge rabalakia, ge sisi puru na ulo a darana.

⁵¹Muri ge bole a mavilana a kai a sida, a rahana kai a hisop, a mota vururu turana a kadirovo mahuri tara. Ge lutu a maki nga na ulo i vona a dara a naru, ge voro tamali langa na ruma balaka polorua.

⁵²A prister ge rata maea a ruma, lakea bara i matapado.

⁵³Muri bara i pugea a kadirovo mahuri i bebe lakea na robo. Ra naro iea ne vona ni vakalobo a maki i muto na ruma, lakea a ruma bara i matapado.”

⁵⁴Ra vinara nga ne vona a gilanga na kuli ra patala, a hini i makali,

⁵⁵ne vona a limuta i tuvu na varakia na ruma,

⁵⁶ne vona a loto, a pero, a vuruputuka.