Levi 13:1-19

¹E BAKOVI DAGI i taki e Moses e Aron i ta maea,

²“Na tahuna a viri i tahoka a ngarava, a loto, a maki tara i kavuvu i vururu na kulina, lakea i vakabele a patala, a bakovi ni gi tuli lakea ne Aron a prister, o ge lakea ne tuna tara a prister.

³A prister ge lei kamumua a hini i hale na kulina. Na tahuna i matai a vungana na kulina i kea, a gilanga i dupi dili na kulina, ra gilanga iea a patala. Muri na prister i lei loboa, ge vakalongoa i muto.

⁴Pali a hini hale na kulina i uka ma i kea a vungana ge dupi, ge tonoa ge hamule na ruma vona, ge made kikeri tabu na parava ge polorua.

⁵Na poloruana parava a prister ge lei tabua. Pali a prister ge masia i uka ma i mavu i rako lae na kulina a gilanga, ge takia a bakovi ge made kikeri tabu na parava ge polorua.

⁶Na poloruana parava a prister ge matai tabua, a gilanga na kulina i lobo o i uka. A gilanga ge lobo, a prister ge takia i matapado, ra gilanga iea a gilanga tavula. Muri a bakovi ge vahilolo a maka varakia vona, ge matapado ia.

⁷Pali muri na parava i vakasiri ia na prister, a gilanga na kulina i bele tabu, a bakovi iea ge vano ge matai tabua a prister.

⁸A prister ge lei kamumu tabua a gilanga na kulina. A gilanga ge rako lae na kulina, ra bakovi iea i tahoka a patala. A prister ge vakalongoa i muto.

⁹“A viri i tahoka a patala ni gi tuli lakea na prister.

¹⁰A prister ge lei kamumua a kulina, ge masia a kulina i vaki, i kea, i ratea a vungana i kea, i mapoka a hini i vaki,

¹¹ra bakovi iea i tahoka a patala. A prister ge vakalongoa a bakovi iea i muto. Ngane a prister i lohoka vona, ra bakovi iea i muto, pali nahea ge tonoa ge made kikeri.

¹²“Na tahuna a prister i masia a patala i rako lae na kulina viri, i tubu na gina i puru na vahana,

¹³a prister ge lei kamumu tabua a kulina. Ia ge masia a gilanga i rako lobo na kulina, i ratea a kulina i kea, a kulina ge kea lobo, ra bakovi iea i matapado, a vuhuna a kulina i kea lobo pali.

¹⁴Pali na tahuna a patala i mapoka, i tabuli kavakava a bobona, ra bakovi iea i muto.

¹⁵A prister ge lei tabua a patala, ge masia i mapoka, i tabuli kavakava a bobona, ra bakovi iea i muto. Ra gilanga maea i hale hateka.

¹⁶Pali na tahuna a gilanga i lobo, i keke a murina, ra bakovi iea ge hamule lakea tabu na prister.

¹⁷A prister ge lei kamumua a kulina a bakovi iea, bara i masia i lobo, i keke a murina a patala, ra bakovi iea i matapado. Muri ge vakalongoa i matapado pali.

¹⁸“A viri tara ge tahoka a loto na kulina, a loto vona i mavu,

¹⁹muri a murina loto i keke, i vaki tala, i vururu, ra bakovi iea ge lakea na prister.