Levítico 22:12-32

¹²”Dule-irwa-Babse-goled-e-sisgwa, dule-irwa-Babse-goledsulidbo-nikusale, we-ome, Bab-Dummadga-we-ibmar-islidikid-ukleged gunnosulid.

¹³Ar dule-irwa-Babse-goled-e-sisgwa ei-sui burgwenonidibe, mimmi-nikussuli e-sui-metedibe, na e-bab-negse gannar nonikile, ar igi yoo-sui-nikugu, e-bab-masgunned gundii gusa, deyobi, gannar e-bab-masgunned gundii gubaloed. Ar dule-baigandi, bipisaale we-mas gunnosulid.

¹⁴”Ar dule-gwensak wissulidgi ibmar-islidikid guchale, we-dule, we-ibmar-guchad-wilub gannar dule-irwa-Bab-Dummadse-goledga ibmar ukoed. A-ukinbali, ibmar-atargi-gwensak napi ukbaloed.

¹⁵”Degisoggu, dule-irwa-Babse-gormalad Israel-dulemar Bab-Jehováʼga-ibmar-islidikidmalad-ukleged-oichogega imakosulid.

¹⁶Ar dule-wargwen, we-ibmar-islidikid-ukleged-guchale, na dukin e-isgued sedii guoed. Ani an Bab-Jehová, wemar angarbi-arbaega an nug-imaksad.”

¹⁷Bab-Jehová, Moisésʼga sogdebalid:

¹⁸“Aarónʼga, degi, e-masmalaga, deginbali, bela Israel-dulemarga be sogo: ‘Ar Israel-dule-wargwendibe, Israel-dulesulid-bemar-abargi-maiddibe, ibmar-imakoye-sogsad-ular, igi, na e-itoleged ibmar-ukbied-ular, Bab-Jehováʼga ibmar ogumakar ukele,

¹⁹we-ibmar, Bab-Jehová-nabir-abingaegala, ibmar-durgan-machered-swilidikid, boni-nikasulid ukoed. Sunna moli-bebe-nikad-machered, sibad-wawaad-machereddibe, sibad-machereddibe, ukoed.

²⁰” ’Ibdurgan-wis-boni-nikad bipisaale Bab-Jehováʼga be ukosulid, ar ade, Bab-Jehová we-ibmar bei abingaosulid.

²¹” ’Amba deyobbardo, ar dule-gwensak ibmar-imakoye-sogsad-ular, igi, na e-itoleged-ibmar-ukbied-ular, gwenatigwar-guega, Bab-Jehováʼga moli-bebe-nikad, sibad-wawaaddibe, sibaddibe, ukele, we-ibdurgan-swilidikid, boni-nikasulid ukoed, adi, nabir Bab-Jehová we-ibmar-uknaid abingaegar.

²²Bab-Jehováʼga ibdurgan-aku-atakmalad, muya-muya-nanamalad, nag-sikarmalad, yaa-nikamalad, uka-sensenmalad, uka-muru-murumalad, be ukosulid. ” ’Deginbali, we-ibmarmar ibmar-ogumakar-ukleged-ailagi, Bab-Jehováʼga be ogumakar ukbalosulid.

²³Sunna be-itoleged ibmar-ukbiedba anga be moli-bebe-nikad, igi, sibad-wawaad-wis-bonigwaled uked. Ar ibmar-imakoye-sogsad-ular, ibdurgan-degiid be ukerdi, Bab-Jehová bei abingaosulid.

²⁴Bab-Jehováʼga ibdurgan alugwag-bonigwaled, alugwag-madareged, alugwag-gwasualed, degi, alugwag-sikaled be ukosulid. Be-yalagi ibdurgan-degimalad Bab-Jehováʼga be ukosurmalad.

²⁵” ’Deginbali, ibdurgan-degimalad be-Bab-Jehováʼga-ukega, Israel-dulesulid-abin be abingabalosulid, ar ade, we-ibdurganmar bonigwaledid. Degisoggu, be-ibe abingalegosulid.’ ”

²⁶Bab-Jehová, Moisésʼga sogdebalid:

²⁷“Moli-bebe-nikad-e-mimmi gwalulesdibe, sibad-wawaad-e-mimmi-gwalulesdibe, igi sibad-e-mimmi-gwalulesdibe, na e-nan-walik ibagugle (7) gudii guoed. Geb ibabaabakgine (8) sunna bemar anga we-ibdurgan ogumakar ukoed.

²⁸”Melle iba-galagwena moli-bebe-nikad-ome, e-mimmi-ebo, igi, sibad-wawaad-ome, e-mimmi-ebo e-ibe be e-dukar egwanno.

²⁹”Be anga dog-nuedye-sogega, ibmar uknaile, nue igar-maidba-imakar be ukoed. Adi, an nabir abingaegar.

³⁰We-ibmar-be-anga-uknaid, a-ibagi be gunnoed. Banedga, we-ibmar be sabogosulid. Ani an Bab-Jehová gued.

³¹”An-igarmar-mamaidba be ibsamala, eba be ibmar-imakdii gumala. Ani an Bab-Jehová gued.

³²”An-nug-islidikidgi melle be dodomalo, adi, Israel-dulemar-abargi an-nug islidik guegar. Ani an Bab-Jehová bemar islidik imaked.