Levítico 19:10-33

¹⁰” ’Melle be-uva bela ise-wear be imako, deginbali, uva-napagi-argwachamalad, melle bar be subalo. Ar we-uva-argwachamalad dule-wileganaga, degi, Israel-dulesulidmarga be obegoed. Ani an be-Bab-Dummad-Jehová gued.

¹¹Melle ibmar be atursao. Melle be gakansao. Melle na be muchub-muchub yardakmalo.

¹²Melle an-nuggi be ise-sogar-sogo: An ibmar imakoye. Ar degiile, be-Bab-Dummad-nug be oichogoed. Ani an Bab-Jehová gued.

¹³Melle be-dulemar be aporsao, deginbali, melle e-ibe be ibmar atursabalo. Dule-bega-arbaed yog be bennukar imako, melle banedse e-ibe be mani gao.

¹⁴Melle dule-uaya-yalliled be ukabsao. Deginbali, melle dule-ibyasulid ibmargi-yolegega be imako. Bur be be-Bab-Dummad-dobee nanadii guo. Ani an Bab-Jehová gued.

¹⁵Igar-nabolenaile, igar-innikigwadba be imako. Melle dule-wilegedba be nai guo. Deginbali, melle dule-mani-nikadba be nai gubalo. Dulemarga igar-innikigwadba be igar-nabogo.

¹⁶Melle be dulemargi yogasaar sunmako. Melle dule-baid-oburgwedgi be binsao. Ani an Bab-Jehová gued.

¹⁷Melle be-gwenad be isdar dako. Dule-baid isgusale, ega be bakar ibmar soge, adi, melle e-isgusadba be nagumogagar.

¹⁸Melle be-dulemar be buged-mai imako, deginbali, melle isdar-dakdii be gubalo. Ar igi na be san-sabgue, deyobi dule-baid be sabgumogoed. Ani an Bab-Jehová gued.’ ”

¹⁹Bab-Jehová Moisésʼga sogdebalid: “Israel-dulemarga be sogo: ‘Bab-Jehová-Igar-Mamaidba be nanadii gumalo. Melle be-moli-bebe-nikadmar ibdurgan-baidbo be onakdii guo. Melle be-nainu-gwensakgine, ibmar-gwag be akar-akar digo. Melle dub-baid-baidgi-oburar-mor-makaled be yoo.

²⁰” ’Ar dule-gwensak, ome-maiga-gudiid-sui-nikusokalidbo negsichigi galagwensuli nanasale, ar amba we-ome yoo manigi onolegele, deginbali, amba yoo maiga-gudiidgi ollorgubalile, ebobela sabsur-odurdaklemaloed. Degi-inigwele, oburgwilegosurmalad, ar ade, ome, amba yoo maiga-gudiidgi ollorgued.

²¹We-machered, na e-isgusad-ular, sibad-wawaad-machered Bab-Jehováʼga ukoed. We-sibad-wawaad-machered Bab-Dummad-dulemarbo-ambikued-neg-yawagakse sedoed.

²²Geb dule-irwa-Bab-Dummadse-goled, we-sibad-wawaad-machered isgusad-ular-uklenaidgi, Bab-Jehováʼga sogoed, we-dulega isgued eliye. Weyobi, dulega, e-isgued elilenonikoed.

²³” ’An-bemarga-yar-uknaidse bemar dogsale, agi bemar sapi-nabir-gullemalad-digsale, gebe we-sapimar-sanmakoed birgapaa be gunnosurmalad, ar ade, we-sapi-e-san bemarga isganaga guoed.

²⁴Birgabakegwadgine, bela we-sapi-e-san Bab-Jehová-nug-odummogega Bab-Jehováʼga nugsalegoed.

²⁵Geb birgataledgine, sunna bemar we-sapi-e-san gunmaloed. Deyobi, we-sapi bela-bela bemarga sanmakdoed. Ani an bemar-Bab-Dummad-Jehová gued.

²⁶Melle san abebi be gunmalo. Melle ibmar-wilubgan-dakedgi yoedse-ibmar-guoed-sogdii be gumalo. Melle nia-igar-dule-oichogedgi arbao.

²⁷Melle sailagia orokwaa be sikmalo. Deginbali, melle be-siga-e-duku be sikbalo.

²⁸Dule-burgwisad-ular, melle be-san na be daas-daas imako, deginbali, melle be-sangi ibmar yogasaar narmakar be sobo. Ani an Bab-Jehová gued.

²⁹Melle be-sisgwa gambanuchuga be imako, adi, melle be-sisgangi we-igar-isgana dogega. Ar degiile, be-yala bela-bela isgudoed.’ ”

³⁰Bab-Jehová Moisésʼga sogdebalid: “Israel-dulemarga be sogo: ‘An-obunnoged-ibagi be obunnomalo, degi, anse-goled-neg melle neg-isganayob be dakmalo, egi be binsaed-nikaa damalo. Ani an Bab-Jehová gued.

³¹” ’Melle dule-burwarmaladbo-sunmakmarye-sogmaladse be idakmalo. Deginbali, melle burba-isganase-gormaladse be idakmarbalo. Ar deyob be imakmalale, eba be isgumarmogoed. Ani an be-Bab-Dummad-Jehová gued.

³²Dador begi danikile, iduale be gwichibin imako. Dadormargi be binsaed-nikaa dao. Be-Bab-Dummad-dobee be nanao. Ani an Bab-Jehová gued.

³³” ’Dule-yar-baidsikid bemar-yargi-megnonikile, melle be sabsur-imakmalo.