Lepin Padahk Audapan Kan 6:5-20

⁵Doareiukasang nan lidip wet, rasehng menpihr de tie men me kin tangasang sounlidip kan.

⁶Aramas pohnkahke kan uhdahn pahn ale padahk sang ni mwomwen mouren ketitik kan.

⁷Sohte arail sounkaweid, soumas, de kaun,

⁸ahpw re kin nekidala kanarail kisin mwenge ni ahnsoun karakar, kaunopadahng ahnsoun kopou.

⁹Eri, ia erein aramas pohnkahke men eh pahn wonohnte? Iahd me e pahn kak pwourda?

¹⁰E kin kalap nda, “I pahn ekis meir. I pahn kihpene pehi kat oh kommoal.”

¹¹Ahpw ni eh pahn memeir, semwehmwe pahn kalowehdi, rasehng sounpirap emen.

¹²Aramas suwed oh sohte katepe kin kohkohseli wiewiaseli likamw.

¹³Re kin manih aramas oh wia mwekid en widing kei pwe re en pitihiuk,

¹⁴nindokon ar kin koasoakoasoane mehkot suwed nan ar madamadu pirek, wiewia kahpwal wasa koaros me re pahn kohla ie.

¹⁵Pwehki met, kahpwal laud pahn lelohng irail ni ar sasairki, oh re pahn mehkihla ohla laud.

¹⁶Mie soahng isuh me KAUN-O kin ketin suwediki oh inenen kalahdeki mehlel: mwomwen aklapalap, au likamw, peh kan me kin kemehla aramas me soh-dipe, mohngiong me kin koasoanehdi mehkot suwed, mehmen me kin mwadang en wiahda me suwed, sounkadehde me kin kalapw lokaia likamw, oh aramas emen me kin kahreda kahpwal nan pwungen irail me mie limpoakpene.

²⁰Samwa, kapwaiada dahme omw pahpa padahkihong uhk oh dehr manokehla padahk en omw nohno.