Lepin Padahk Audapan Kan 3:11-27

¹¹Samwa, ni ahnsou me KAUN-O pahn kapwunguhkala, rong kanahieng, oh alehda nin duwen kehkehlik ehu.

¹²KAUN-O kin ketin kapwungala irail kan me e kin ketin loalloale, duwehte sahm emen eh kin kapwungala nah pwutak me e kin suweiki.

¹³Meid kaperen ong aramas me kin loalokongla—oh dehdehkihla.

¹⁴Met me mwahusang silper, pwe me katep laud ong uhk sang kohl.

¹⁵Kupwurokong kesempwal sang mehlel takai kesempwal kan; sohte mehkot me ke pahn mwahuki me kak pahrekiong kesempwal en kupwurokong.

¹⁶Kupwurokong kin kihong uhk ke en mour werei, oh kepwehpwe, oh wahun.

¹⁷Kupwurokong kak kaparanda omw mour, oh kahluwaiuk pwe ke en dehr perki mehkot.

¹⁸Irail kan me loalokonglahr kin pereperen; kupwurokong pahn kihong irail mour.

¹⁹KAUN-O ketin kapikekihda sampah sapwellime kupwurokong; sapwellime erpit me e ketin koasoanehkihdiong pahnlahng nan dewe.

²⁰Sapwellime kupwurokong me kahrehda pillap akan ar pwilipwiliwei, oh depwek kan en kamwerehdi keteu pohn sampah.

²¹Samwa, katengediong loalomw omw loalokong oh erpit. Ke dehr mweidohng en dohsang uhk.

²²Pwe iei ih me pahn kahrehiong uhk mour kaperen oh kansenamwahu.

²³E pahn doandoareiuk nan elomw oh ke sohte pahn dipekelekel.

²⁴Ke pahn nsenamwahu ni omw pahn meirla, oh ke pahn meir mwahu pwohng ehu pwon.

²⁵Ke sohte pahn pwunodki duwen paisuwed eh pahn mwadangete lelohng uhk, rasehng melimel me kin lelohng aramas suwed kan.

²⁶KAUN-O pahn ketin sinsileiuk. E sohte pahn ketin mweidohng ke en pwupwudiong nan lidip.

²⁷Ahnsou koaros me ke kak, sewese irail kan me kin anahne sawas.