LEPIN PADAHK AUDAPAN KAN 30:15-29

¹⁵Soangen kisin mahn kis me kin mihkasang nta naineki serepein riemen, eri, ira koaros adaneki “Kihdo!” Mie soahng pahieu me sohte kin itarki dahme mie rehrail:

¹⁶wasahn me melahr akan, Lih depwen men, sapw madekeng me kin anahne keteu, oh kisiniei me luldahr solahr kak katoktokdi.

¹⁷Mehmen me kin kapailoke seme de mwamwahlikihla ine ni ara likeilapalahr, e konehngete menpihr kan en kangala de menpihr kommwad akan en palihasang pwoaren mese kan.

¹⁸Mie soahng pahieu me uhdahn rir ong ie I en wehwehki:

¹⁹ikel men me pipihrseli pahnlahng, sineik men me limwilimwahdek pohn takai ehu, sohp pwoat me kak seiseiloakseli nan madau, oh ohl emen oh lih emen ni ara kin limpoak pene.

²⁰Iet duwen dahme lih pwopwoud men me kin kamwahlih eh pwoud kin wia: mwurin eh kin kamwahl, e kin duhduhla, oh nda, “Sohte mehkot sapwung I wiahda!”

²¹Mie soahng pahieu me pein sampah sohte kak en mweidohng en wiawi:

²²lidu men en wiahla nanmwarki, pweipwei men en rekiki kisin tungoal,

²³lih emen me aramas kailongki en pwopwoudida, oh serepein lidu men en wiliandi nan dewen eh lih soumas.

²⁴Mie soangen mahn pahmen nan sampah me keieu tikitik, ahpw inenen loalokong:

²⁵Ketitik: re inenen luwet, ahpw re kin kihpene kanarail kisin mwenge ni ahnsoun karakar.

²⁶Rak-padser: re pil sohte kehlail, ahpw re kin wiahda arail wasahn kousoan nan pwungen takai kan.

²⁷Loukust: sohte arail nanmwarki, ahpw re kin pihrwei ni mwekid pahrek.

²⁸Lamwer kan: ke kak kolokol nan pehmw, ahpw re pil kin iang mihmiseli nan tehnpesen nanmwarki kan.

²⁹Mie soahng pahieu me kapwuriamwei aramas en kilang ni ar kin aluhwei: