Legic 73:14-26

¹⁴Ni kaiwe herec ʒérabéra mihicŋima siŋunec séc ʒéqindiŋi waŋnéŋu kecaŋi.

¹⁵Ni imuhuc ʒéaumaŋ ʒé ʒéwinec miŋ kewuac nambérac héra ikoc waŋ énécmiwinec

¹⁶Dimuhuc hénia imi niŋasarimaŋ ʒéma batucgéma nimba sécna ogicma yéwéria waŋec.

¹⁷Waŋu Anutuac ocmuŋ qeriaiguc keremma nimmaguc kekecginawac tetecgia imi niŋasariyi.

¹⁸Hélacnec geŋ mia ic biria ini baec susuraciguc onopocma humucac buŋa gili énécmianʒaŋ.

¹⁹Ieneŋ dimuhuc éléŋnec birianʒu? Tericgé énécmina aurigic, usuŋénécmina qahac waŋanʒu.

²⁰Ic neŋaŋ gau igucnec yacma gau héŋiŋ imuac ninni eŋomia waŋanʒac ésécnec gi yacbésémaŋ nalé imuaru ionac niŋna eŋomia wandacmac.

²¹Ewa biric wamba wéiwécnaiguc néyu

²²ni sicsaoc niniŋna qahac kecba kicganéŋ nénna wéségaiguc haséŋ yaŋ ésécnec waŋi.

²³Waŋu geŋ mia nuac méra héinaiguc késana ni nalé séc giguc kecanʒua.

²⁴Geŋ pakeŋ acganéŋ ʒéqindiŋi némma biaŋ kecma edamugaiguc nuagicma kembésémaŋ.

²⁵Gi qahac waŋu mérénéŋ kurumeŋiguc kecnénʒac? Gi qahac waŋu, baeciguc méŋac méŋ niŋkumuma kecmaŋac séc qahac.

²⁶Séwi qerina imi ɋasima kenʒac, néŋ Anutu gi imi ewa qerinawac kuha ʒéma buŋana hémbénaŋa wanʒaŋ.