Text copied!
CopyCompare
PIIPILI ƖSƆ TƆM TAKƎLAƔA - Lefii - Lefii 8

Lefii 8:15-33

Help us?
Click on verse(s) to share them!
15Ḿpʋ́ɣʋ́ Moisi lɛntɑ-ɩ, nɑ ɩ́ lii mpǝle kɛ ɩ cɑlǝm tɑɑ, nɑ ɩ́ nyɔtɔ Ɩsɔ kɔtɑɣɑ tǝlɑtɛ ŋkuluŋɑsɩ tɑɑ hǝlǝŋɑsɩ tɔɔ, nɑ pǝ́ tɑɣɑnɩ-tɛ. Ɩlɛnɑ ɩ́ pǝlɩ cɑlǝm kʋkɑɑsǝm kɛ kɔtɑɣɑ tǝlɑtɛ tɛɛ. Ɩsǝnɑ ɩ lɑpɑ nɑ kɔtɑɣɑ tǝlɑtɛ pǝsɩ Ɩsɔ nyǝntɛ nɑ pɑ́ lɑkǝnɑ-tɛɣɛ ɩsɑɣɑtʋ hɩɩsʋɣʋ kɔtɑsɩ tɔɣɔlɛ.
16Ḿpʋ́ɣʋ́ Moisi kɔɔlɑ nim tǝnɑ, mpi pǝ pɑmɑ kpǝntɛ lotu tɔɔ tɔ. Pɑɑ timpee nɑɑlɛ nɑ ɑ nim, nɑ ɩ́ sɛtɩ hɔɔlɛ nɔɣɔ, nɑ ɩ́ nyɑɣɑsɩ pǝ tǝnɑɣɑ Ɩsɔ kɔtɑɣɑ tǝlɑtɛ tɔɔ.
17Pǝ kɑɑsǝɣɩ nɑʋ ɩnɩ ɩ tɔnʋɣʋ nɑ ɩ nɑntʋ nɑ pǝ tɑɑ lotu, ɩlɛnɑ pɑ́ lɩɩnɑ pǝ tǝnɑɣɑ tesikile wɑɑlɩ, nɑ pɑ́ nyɑɣɑsɩ kɔkɔ, ɩsɩɩ Tɑcɑɑ kɑ sɩɩʋ tɔ.
18Ḿpʋ́ɣʋ́ pɑ kɔnɑ kɔtɑɣɑ ŋkɑ kɔkɔ lusɑ kɑ tǝnɑ tɔ kɑ ɩwɑɑʋ, nɑ Alɔŋ nɑ ɩ pǝyɑlɑɑ pɑ́ tǝnɩ pɑ niŋ kɛ kʋ nyʋɣʋ tɔɔ.
19Moisi lɛntɑ-kʋ, ɩlɛnɑ ɩ ŋmɩɩsɩ kʋ cɑlǝm kɛ kɔtɑɣɑ tǝlɑtɛ kɔŋkɔmǝŋ tɔɔ.
20Ɩlɛnɑ ɩ fɑɣɑ-kʋɣʋ piliŋɑsɩ, nɑ ɩ́ nyɑɣɑsɩ pǝ nɑ pǝ nyʋɣʋ nɑ pǝ nim.
21Ɩlɛnɑ ɩ́ nyɑɑlɩ lotu nɑ nɔŋkpɑɑsɩ kɛ lʋm, nɑ ɩ́ nyɑɣɑsɩ pǝ nɑ nɑntʋ nti tǝ kɑɑsɑɑ tɔɣɔ kɔtɑɣɑ tǝlɑtɛ tɔɔ. Kɔtɑɣɑ ŋkɑ kɔkɔ lusɑɑ tɔɣɔlɛ. Kɑ sɔɔsʋŋ kɛ Tɑcɑɑ cɑɑkɩ.
22Ḿpʋ́ɣʋ́ Moisi yelɑɑ nɑ pɑ́ kɔnɑ ɩwɑɑʋ nɑɑlɛ nyǝŋkʋ ŋku pɑɑ lɑ kɔtɑɣɑ nɑ pǝ́ sʋsɩ Alɔŋ nɑ ɩ pǝyɑlɑɑ kɛ kɔtǝlɑɑ tǝmlɛ tɑɑ tɔ. Ɩlɛnɑ pɑ́ tǝnɩ pɑ niŋ kɛ kʋ nyʋɣʋ tɔɔ.
23Ḿpʋ́ɣʋ́ Moisi lɛntɑ ɩwɑɑʋ ŋkʋ, ɩlɛnɑ ɩ́ lii kʋ cɑlǝm nɑ ɩ́ tɑɑ-wǝɣɩ Alɔŋ ŋkpɑŋʋɣʋ ntɔɣɔŋ nyǝŋkʋ nɔɣɔ tɑɑ. Ɩ tɑɑ-wɩ tɔtɔɣɔ ɩ ɑpɑlʋmpǝle ntɔɣɔŋ nyǝntɛ tɔɔ, nɑ ɩ ɑpɑlʋnɔmpǝle ntɔɣɔŋ nyǝntɛ tɔɔ tɔtɔ.
24Ɩlɛnɑ ɩ́ yele nɑ Alɔŋ pǝyɑlɑɑ kɔɔ nɑ ɩ́ tɑɑ cɑlǝm tɔtɔɣɔ pɑ ntɔɣɔŋ ŋkpɑŋŋ nɔɔsɩ tɑɑ, nɑ pɑ ntɔɣɔŋ ɑpɑlʋmpee nɑ ɑpɑlʋnɔmpee tɔɔ. Ɩlɛnɑ ɩ́ ŋmɩɩsɩ cɑlǝm kʋkɑɑsǝm kɛ kɔtɑɣɑ tǝlɑtɛ kɔŋkɔmǝŋ tɑɑ.
25Ḿpʋ́ɣʋ́ Moisi kpɑɣɑ ɩwɑɑʋ nɑntʋ nim nyǝntʋ. Ɩsɩɩ sukɑ, nɑ lotu tɑɑ nim, nɑ hɔɔlɛ nɔɣɔ, nɑ timpee nɑɑlɛ nɑ ɑ nim, nɑ yule ntɔɣɔŋ nyǝntɛ.
26Ɩlɛnɑ ɩ́ lǝsɩ kʋkʋsʋm fɛɩ potopotonɑɑ mpɑ pɑ hɑ Ɩsɔ tɔ, pɑ tɔkʋ tɑɑ kɛ́ pǝ kɑkɑlɑɣɑ kʋlʋmɑɣɑ, nɑ nim nyǝŋkɑ, nɑ tinte pɑɣɑlɛ, nɑ ɩ́ sɩɩ nɑntʋ nim nyǝntʋ nɑ ntɔɣɔŋ yule pǝ tɔɔ.
27Ɩlɛnɑ ɩ́ tʋ́ pǝ tǝnɑɣɑ Alɔŋ nɑ ɩ pǝyɑlɑɑ pɑ niŋ tɑɑ, nɑ ɩ́ heeli-wɛ sɩ pɑ́ hɑ-tǝɣɩ Tɑcɑɑ.
28Pǝ wɑɑlɩ kɛ́ Moisi mʋ kʋhɑɑŋ ɩnǝɣɩ pɑ niŋ tɑɑ nɑ ɩ́ nyɑɣɑsɩ-ɩ kɔtɑɣɑ tǝlɑtɛ tɔɔ kɛ́ kɔtɑsɩ nsi kɔkɔ lusɑɑ tɔ sɩ tɔɔ. Kɔtǝlɑɑ tǝmlɛ tɑɑ sʋʋʋ kɔtɑɣɑ ntɛ. Pǝ kɔtɑɣɑ ŋkɑ kɔkɔ lusɑ kɑ tǝnɑ tɔɣɔlɛ. Pǝ sɔɔsʋŋ kɛ Tɑcɑɑ cɑɑkɩ.
29Ḿpʋ́ɣʋ́ Moisi kpɑɣɑ kɔtǝlɑɑ tǝmlɛ tɑɑ sʋʋʋ kɔtɑɣɑ kpǝntɛ lɑŋlɛ, nɑ ɩ́ hɑ Tɑcɑɑ kɛ kɔtɑɣɑ tǝlɑtɛ kiŋ. Ɩlɛnɑ nɑntʋɣʋ ŋkʋ kʋ pǝsɩ Moisi nyǝŋkʋ ɩsɩɩ Tɑcɑɑ kɑ sɩɩʋ tɔ.
30Pǝ wɑɑlɩ kɛ́ ɩ kpɑɣɑ kɔtɑɣɑ nim, nɑ cɑlǝm mpi pɩɩ wɛ Ɩsɔ kɔtɑɣɑ tǝlɑtɛ tɔɔ tɔɣɔ pǝcɔ, nɑ ɩ́ ŋmɩɩsɩ Alɔŋ nɑ ɩ wontu tɔɔ. Nɑ ɩ pǝyɑlɑɑ nɑ pɛlɛ pɑ nyǝntʋ tɔɔ tɔtɔ. Ɩlɛnɑ Alɔŋ nɑ ɩ pǝyɑlɑɑ nɑ pɑ wontu kʋsusuutu pɑ pǝsɩ Ɩsɔ nyǝm.
31Ḿpʋ́ɣʋ́ Moisi heelɑ Alɔŋ nɑ ɩ pǝyɑlɑɑ sɩ: Ɩ́ tǝsɩ heu ɑpɑlʋ nɑɑlɛ nyǝŋ nɑntʋ kɛ tǝsulle cokǝle nɔnɔɣɔ. Ɩlɛnɑ ɩ́ tɔɣɔ-tǝɣɩ tǝnɑɣɑ mǝ mɑɣɑmɑɣɑ, nɑ potopotonɑɑ mpɑ pɑ lɑpɑ kɔtɑɣɑ tɔɔ tɔ. Ɩsɩɩ mɑ kɛɛsʋɣʋ-mɛ tɔ.
32Ye pǝ kɑɑsɑ nɑntʋ yɑɑ potopoto, pǝ wɛɛ sɩ ɩ́ kɑ́ wɔ kɔkɔ.
33Ɩ́ kɑ́ cɑɣɑ tǝsulle cokǝle nɔnɔɣɔ kɛ kʋyɛɛŋ nɑɑtosompɔɣɔlɑɣɑ. Pǝ fɛɩ sɩ ɩ́ lɩɩ tǝnɑ. Hɑlǝnɑ mǝ tǝmlɛ tɑɑ sʋʋʋ kɔtɑɣɑ kʋyɑkʋ kɑncɑɑlɑɣɑ nɑ kɑntǝkɑɣɑ nyǝŋkʋ wule.

Read Lefii 8Lefii 8
Compare Lefii 8:15-33Lefii 8:15-33