Lefii 6:12-21

¹²Ḿpʋ́ɣʋ́ Tɑcɑɑ tɔmɑ Moisi sɩ:

¹³Ye pɑ kpɑwɑ Alɔŋ nɑ ɩ pǝyɑlɑɑ kɛ kɔtǝlɑɑ, nɑ pɑ́ pǝlɩ-wɛɣɛ nim, pǝ wɛɛ sɩ pɑ́ kɔŋnɑ-m kʋhɑʋ kɛ mʋlʋm kiloonɑɑ toosoɣo pɑɑ kʋyɑkʋ ŋku. Hɔɣɔlʋɣʋ kɛ tɑnɑŋ nɑ lɛŋkʋ kɛ tɑɑnɑɣɑ.

¹⁴Pɑɑ nuɣuti mʋlʋm mpǝɣɩ nɑ nim, nɑ pɑ́ tʋ́ pǝ pɛtɛpɛtɑɣɑ kɛ nyǝɣǝlʋɣʋ kʋwɑlʋɣʋ tɔɔ. Pǝ wɑɑlɩ ɩlɛnɑ pɑ́ pʋtǝtɩ-kɛ nɑ pɑ́ ponɑ kɔtɑɣɑ tǝlɑtɛ tɔɔ, nɑ Tɑcɑɑ lɑŋlɛ hɛɛnɑ kɔtɑɣɑ ŋkɛ kɑ sɔɔsʋŋ.

¹⁵Ye wɑɑtʋ nɔɣɔlʋ pɑ kpɑ Alɔŋ lʋlʋɣʋ nyǝ́mɑ tɑɑ nɔɣɔlʋɣʋ kɔtʋlʋ sɔsɔ sɩ, ɩ́ lɛɛtɩ kʋpǝŋ lonte. Kʋhɑʋ kʋlʋmʋɣʋ ŋkʋɣʋ ɩ kɑ́ kɔnɑ, nɑ ɩ́ nyɑɣɑsɩ pǝ tǝnɑɣɑ Tɑcɑɑ mɑ́. Pǝ kɛ́ mɑ kiiu tɑm tɔɔ nyǝŋkʋ kɛ́.

¹⁶Ye kɔtʋlʋ kɔnnɑ ɩ mɑɣɑmɑɣɑ ɩ tɔɣɔnɑɣɑ kʋhɑʋ, pǝ wɛɛ sɩ pɑ́ nyɑɣɑsɩ pǝ tǝnɑɣɑ, pǝ tɑɑ pʋlʋ fɛɩ tɔɣɔʋ.

¹⁷Ḿpʋ́ɣʋ́ Tɑcɑɑ tɔmɑ Moisi sɩ:

¹⁸Tɛlǝsɩ Alɔŋ nɑ ɩ pǝyɑlɑɑ kɛ ɩsɑɣɑtʋ hɩɩsʋɣʋ kɔtɑsɩ kʋsǝsɩɩtʋ. Lonte nte tǝ tɑɑ pɑ lɛntǝɣɩ kɔtɑsɩ nsi kɔkɔ lusɑɑ tɔ, sɩ tɔlɑ tɔɣɔ pɑɑ lɛntɩ ɩsɑɣɑtʋ hɩɩsʋɣʋ nyǝntɛ tɔtɔ. Pǝ nɑntʋ kɛ kɑtɛ tɑɑ kɑtɛ pʋlʋpʋɣʋ.

¹⁹Kɔtʋlʋ wei ɩ lɑpɑ pǝ tǝmlɛ tɔ, tǝsulle cokǝle kɑtɑɣɑ tɑɑ kɛ́ pǝ wɛɛ sɩ ɩ́ tɔɣɔ-tǝɣɩ lonte nte tǝ wɛnɑ tǝ mpɑɑ tɔ tǝ tɑɑ.

²⁰Ye yʋlʋ kɛ yem ɩ́ tokinɑɑ, ɩ lepɑ. Tǝ cɑlǝm ɩ yɑwɑ pʋʋɣʋ tɔɔ, lonte kʋlʋmtǝlɛ ńtɛ́ tǝ tɑɑ kɛ́ pɑɑ nyɑɑlɩ-wɩ.

²¹Ye cʋɣʋ tiipile tɑɑ kɛ́ pɑ tǝsɑ pǝ nɑntʋ, ye pɑ tɛmɑ pǝ wɛɛ sɩ pɑ́ yɔkɩ-tɛɣɛ. Amɑ ye nyǝɣǝlʋɣʋ kʋsɛɛmʋɣʋ nyǝntɛ tɑɑ, ɩlɛ pɑ́ nyɑɑlɩ-tɛɣɛ teu, nɑ pɑ́ kilisinɑ lʋm kɛ sɔsɔm.