Lefii 5:5-15

⁵Ye wei ɩ lɑpɑ ɩsɑɣɑtʋ nti pɑ kɛɛsɑ ɩsǝntɔ tɔ tǝ tɑɑ nɑtǝlɩ, pǝ wɛɛ sɩ pʋntʋ ɩ́ hʋlɩ-tǝɣɩ kɔtʋlʋ, nɑ ɩ́ tisi sɩ ɩ tɔm sǝpɑ.

⁶Nɑ ɩ́ kɔnɑ heu yɑɑ pǝ́ŋ́ nɑ ɩ lɑ ɩsɑɣɑtʋ hɩɩsʋɣʋ kɔtɑɣɑ. Ɩlɛnɑ kɔtʋlʋ lɑpɩ-ɩ pǝ sɔɔsɩ.

⁷Ye yʋlʋ wɩɩ heu yɑɑ pǝ́ŋ́ sɩ ɩ́ lɑnɑ ɩsɑɣɑtʋ hɩɩsʋɣʋ kɔtɑɣɑ. Ɩ pǝsǝɣɩ nɑ ɩ́ cɑɑ ɩhokɑsɩ nɑɑlɛ yɑɑ ɑlukukunɑɑ nɑɑlɛ, nɑ ɩ́ ponɑ Tɑcɑɑ tǝyɑɣɑ tɑɑ. Ɩlɛnɑ ɩ́ lɑ́ lɛlʋ kɛ ɩsɑɣɑtʋ hɩɩsʋɣʋ kɔtɑɣɑ, nɑ lɛlʋ kɛ kɔtɑɣɑ ŋkɑ kɔkɔ lusɑɑ tɔ.

⁸Ɩ cɛlǝɣɩ kɔtʋlʋ kɛ pɑ nɑɑlɛ, nɑ ɩ́lɛ́ ɩ́ hʋ́lɩ́ Ɩsɔ kɛ́ ɩsɑɣɑtʋ hɩɩsʋɣʋ nyǝŋ nɑ ɩ́ yɔkɩ ɩ lumɑɣɑ. Amɑ ɩɩ cɛkɩ nyʋɣʋ.

⁹Ɩlɛnɑ ɩ́ cosi cɑlǝm nɑ ɩ́ ŋmɩɩsɩ-wǝɣɩ kɔtɑɣɑ tǝlɑtɛ kɔŋkɔmǝŋ tɔɔ. Ɩlɛnɑ ɩ́ pǝlɩ kʋkɑɑsǝm kɛ tǝ tɛɛ. Ḿpʋ́ɣʋ́ pǝ wɛɛ sɩ ɩ́ lɑ ɩsɑɣɑtʋ hɩɩsʋɣʋ kɔtɑɣɑ tɔm tɑɑ.

¹⁰Pǝ wɑɑlɩ kɛ́ kɔtʋlʋ lɑkɩ kɔtɑɣɑ ŋkɑ kɔkɔ lusɑ kɑ tǝnɑ tɔɣɔ ɑlukuku nɑɑlɛ nyǝŋ, ɩsɩɩ pɑ sɩɩʋ tɔ. Ɩlɛnɑ ɩ́ lɑ́ pǝntʋlʋ kɛ ɩsɑɣɑtʋ hɩɩsʋɣʋ kɔtɑɣɑ, nɑ Ɩsɔ hɩɩsɩ-tɩ.

¹¹Ye yʋlʋ fɛɩnɑ ɑlukukunɑɑ nɑɑlɛ, yɑɑ ɩhokɑsɩ nɑɑlɛ. Ɩ pǝsǝɣɩ nɑ ɩ́ ponɑ mʋlʋm kiloonɑɑ tooso nɑ ɩ́ lɑ́ ɩsɑɣɑtʋ hɩɩsʋɣʋ kɔtɑɣɑ. Amɑ pǝ fɛɩ sɩ ɩ́ siti nim, yɑɑ ɩ́ tǝnɩ pǝ tɔɔ kɛ́ tulɑɑlʋ kɛ́. Mpi tɔ, pǝ kɛ́ ɩsɑɣɑtʋ hɩɩsʋɣʋ kɔtɑɣɑ kɛ́, pǝ tɑɣɑ tɔɣɔnɑɣɑ nyǝŋkɑ.

¹²Ɩ pukinɑ mʋlʋm mpǝɣɩ kɔtʋlʋ, ɩlɛnɑ ɩ́lɛ́ ɩ́ cosi-wǝɣɩ ŋkute. Ńtɛ́ tǝ kɛnɑ kʋtɔɔsǝm sɩ Tɑcɑɑ tǝnnɑ pǝ tǝnɑ. Ɩlɛnɑ ɩ́ nyɑɣɑsɩ pǝ nɑ kɔtɑsɩ lɛnsɩ nsi sɩ wɛ kɔtɑɣɑ tǝlɑtɛ tɔɔ tɔɣɔ Tɑcɑɑ. Ḿpʋ́ɣʋ́ pǝ wɛɛ sɩ pɑ́ lɑ ɩsɑɣɑtʋ hɩɩsʋɣʋ sɔɔsɩ.

¹³Ɩlɛnɑ kɔtʋlʋ lɑ pʋntʋ kɛ ɩsɑɣɑtʋ hɩɩsʋɣʋ kɔtɑɣɑ nɑ Ɩsɔ hɩɩsɩ-ɩ-tɩ. Ɩlɛnɑ kʋkɑɑsǝm pǝsɩ kɔtʋlʋ nyǝm, ɩsɩɩ tɔɣɔnɑɣɑ kʋhɑʋ sɔɔsɩ tɔm tɑɑ.

¹⁴Ḿpʋ́ɣʋ́ Tɑcɑɑ heelɑ Moisi sɩ:

¹⁵Ye pǝ yʋkǝnɑ yʋlʋ, nɑ ɩ́ sɔɔ Tɑcɑɑ kɛ cɛlʋɣʋ kɛ ɩ nyǝm, pǝ wɛɛ sɩ ɩ́ kɔnɑ ɩwɑɑʋ ŋku kʋ tiili tɑ́ cɑɑmɩ tɔ, nɑ ɩ́ lɑ́ tɑɣɑnʋɣʋ kɔtɑɣɑ. Ɩ lǝsǝɣɩ-kʋɣʋ kɑlǝkʋ tɑɑ kɛ́, nɑ ɩ́ mɑɣɑsɩ nɑ ɩ́ nɑ́ sɩ kʋ liɣitee tɑlɑ ɩsɩɩ pɑ sɩɩwɑ tǝsulle cokǝle tɑɑ tɔ.