Lefii 14:6-25

⁶Ye pǝ kɑɑsɑ sumɑɣɑ ɩsɛ nyǝŋkɑ ɩlɛ ɩ kpɑɣɑ kɛlɛ nɑ tʋɣʋ sɔsɔɔʋ nɑkʋlɩ kʋ tɑɑsɩ, nɑ heeŋ hʋntʋ nti pɑ lii ɑkpɑɑyɑlɑ kʋsɛɛm tɔ nɑ hisɔpʋ piliŋɑ nɑ ɩ́ ŋmilisi pǝ tǝnɑɣɑ sumɑɣɑ ŋkɑ pɑ kʋwɑ sɛɛlʋ lʋm hɛɛʋ tɔɔ tɔ kɑ cɑlǝm tɑɑ.

⁷Ɩlɛnɑ ɩ́ ŋmɩɩsɩ wei ɩnɩ ɩ kʋtɔŋ tɛmɑ mpʋ tɔ ɩ tɔɔ kɛ́ tɔm nɑɑtosompɔɣɔlɑɣɑ. Ɩ tɛŋ hʋlʋɣʋ sɩ ɩ fɛɩnɑ ɑsilimɑ ɩlɛnɑ ɩ́ yele sumɑɣɑ ɩsɛ nyǝŋkɑ nɑ kɑ́ sʋʋ nyɩɩtʋ.

⁸Ɩlɛnɑ ɩnɩ ɩ́ cɔtɔ ɩ wontu nɑ ɩ́ hʋ ɩ tɔnʋɣʋ tɔɔ nyɔɔsɩ, nɑ ɩ́ sɔ lʋm ɩlɛnɑ ɩ ɑsilimɑ tɛ́. Pǝ wɑɑlɩ kɛ́ ɩ sʋʋkɩ tǝsikile. Amɑ ɩ kɑɑ sʋʋ ɩ cokǝle tɑɑ kɛ́, hɑlǝnɑ kʋyɑkʋ siki.

⁹Nɑɑtosompɔɣɔlɑɣɑ nyǝŋkʋ wule kɛ ɩ looliɣi ɩ nyʋɣʋ nɑ ɩ tɑntʋɣʋ nɑ ɩ ɩsǝhutu nɑ ɩ nyɔɔsɩ tǝnɑ, nɑ ɩ́ cɔtɔ ɩ wontu nɑ ɩ́ sɔ lʋm. Ɩlɛ ɩ ɑsilimɑ kɛɛlɑɑ kɛlɛ.

¹⁰Pǝ tɑkɩ kʋyɑkʋ pǝlefɛɩ nɑɑnʋwɑ nyǝŋkʋ wule ɩlɛnɑ kʋtɔntʋ wei pǝ wɑɑwɑ mpʋ tɔ ɩ́ cɑɑ ɩwɛɛsɩ ɑpɑlʋ nyǝŋsɩ nsi sɩ tiili tɑ́ cɑɑmɩ tɔɣɔ nɑɑlɛ nɑ ɑlʋnyǝŋkɑ ŋkɑ kɑ tiili tɑ cɑɑmɩ tɔɣɔ kʋlʋmɑɣɑ, nɑ kʋhɑʋ mʋlʋm mpi pɑ nuɣutinɑ nim tɔɣɔ kiloonɑɑ pɔɣɔlɑɣɑfɛɩ nɑɑnʋwɑ, nɑ nim liitili titite.

¹¹Kɔtʋlʋ wei ɩnɩ ɩ lɑkɩ ɑsilimɑ kɛɛlʋɣʋ kɔtɑɣɑ tɔ ɩ kɑ́ sɩɩ yʋlʋ ɩnɩ nɑ kʋhɑɑŋ kɛ tǝsulle cokǝle nɔnɔɣɔ kɛ Tɑcɑɑ kiŋ.

¹²Ɩlɛnɑ ɩ́ kpɑɣɑ ɩwɛɛsɩ nsɩ sɩ tɑɑ lɛŋkɑ nɑ ɩ́ lɑnɑ-kɛɣɛ tɑɣɑnʋɣʋ kɔtɑɣɑ nɑ nim liitili titite. Ɩlɛnɑ ɩ́ hɑ Tɑcɑɑ kɛ pǝ nɑɑlɛɣɛ ḿpʋ́ɣʋ́ kɔtɑɣɑ tǝlɑtɛ kiŋ.

¹³Ɩlɛnɑ ɩ́ kʋ ɩwǝyɑɣɑ kɛ Ɩsɔ lonte tɑɑ timpi pɑ kʋɣɩ ɩsɑɣɑtʋ hɩɩsʋɣʋ yɑɑ kɔtɑɣɑ ŋkɑ kɔkɔ lusɑ kɑ tǝnɑ tɔ kɑ kpǝntɛ tɔ. Kɔtʋlʋ tǝnnɑ tɑɣɑnʋɣʋ kɔtɑɣɑ kpǝntɛ ɩsɩɩ pǝ wɛʋ ɩsɑɣɑtʋ tɑɣɑnʋɣʋ kɔtɑɣɑ tɔm tɑɑ tɔ. Pǝ kɛ́ kɑtɛ tɑɑ kɑtɛ pʋlʋɣʋ.

¹⁴Ɩlɛnɑ kɔtʋlʋ lii kpǝntɛ cɑlǝm tɑɑ nɑ ɩ́ tɑɑ wei ɩ tɑɣɑnǝɣɩ ɩ tɩ tɔ ɩ ŋkpɑŋʋɣʋ ntɔɣɔŋ nyǝŋkʋ nɔɣɔ tɑɑ, nɑ ɩ niŋ ntɔɣɔŋ ɑpɑlʋmpǝle nɑ ɩ ɑpɑlʋnɔmpǝle ntɔɣɔŋ nyǝntɛ tɔɔ.

¹⁵Ɩlɛnɑ ɩ́ kpɑɣɑ nim liitili titite ńtɛ́ nɑ ɩ́ pǝlɩ ɩ niŋ mpǝtǝŋ tɑɑ.

¹⁶Nɑ ɩ́ lii ɩ ntɑntɑkʋ tɑɑ nim mpɩ pǝ tɑɑ kɛ́ mpǝle ntɔɣɔŋ nyǝntɛ nɑ ɩ́ ŋmɩɩsɩ tɔm nɑɑtosompɔɣɔlɑɣɑ kɛ Ɩsɔ kɔtɑɣɑ tǝlɑtɛ tɔɔ.

¹⁷Ɩlɛnɑ ɩ́ tɑɑ nim mpi pǝ kɑɑsɑ ɩ niŋ mpǝtǝŋ tɑɑ tɔɣɔ wei ɩnɩ ɩ tɑɣɑnǝɣɩ ɩ tɩ tɔ ɩ ŋkpɑŋʋɣʋ ntɔɣɔŋ nyǝŋkʋ, nɑ ɩ ntɔɣɔŋ ɑpɑlʋmpǝle, nɑ ɩ ɑpɑlʋnɔmpǝle tɔɔ timpi pɑɑ tɛmɑ ɩsɑɣɑtʋ hɩɩsʋɣʋ kpǝntɛ cɑlǝm kɛ tɑɑʋ tɔ.

¹⁸Ɩlɛnɑ ɩ́ pǝle ɩ niŋ tɑɑ nim kʋkɑɑsǝm kɛ wei ɩ tɑɣɑnǝɣɩ ɩ tɩ tɔ ɩ nyʋɣʋ tɑɑ nɑ ɩ́ lɑpɩ-ɩ ɑsilimɑ kɛɛlʋɣʋ kɔtɑɣɑ kɛ Ɩsɔ kiŋ.

¹⁹Ɩlɛnɑ kɔtʋlʋ lǝsɩ ɩsɑɣɑtʋ hɩɩsʋɣʋ kʋcɔɔʋ nɑ ɩ́ lɑ́ pǝ kɔtɑɣɑ kɛ wei ɩ tɑɣɑnǝɣɩ ɩ tɩ tɔ ɩ tɔɔ. Pǝ wɑɑlɩ ɩlɛnɑ ɩ́ kʋ́ kɔtɑɣɑ ŋkɑ kɔkɔ lusɑ kɑ tǝnɑ tɔ kɑ kpǝntɛ.

²⁰Ɩlɛnɑ kɔtʋlʋ lɑ Ɩsɔ kɔtɑɣɑ tǝlɑtɛ tɔɔ kɛ́ kɔtɑɣɑ ŋkɑ kɔkɔ lusɑ kɑ tǝnɑ tɔ nɑ kʋhɑʋ nyǝŋkɑ. Pǝ wɑɑlɩ ɩlɛnɑ ɩ́ lɑ́ yʋlʋ ɩnǝɣɩ ɑsilimɑ kɛɛlʋɣʋ kɔtɑɣɑ nɑ ɩ ɑsilimɑ tɛ́.

²¹Ḿpʋ́ɣʋ́ Tɑcɑɑ tɑsɑ yɔɣɔtʋɣʋ sɩ: Ye polom kɛ́ kʋnyɔntʋ nɑ ɩ́ fɛɩnɑ sɔsɔm, ɩlɛ ɩ cɑɑ ɑsilimɑ kɛɛlʋɣʋ ɩwǝyɑɣɑ kʋlʋmɑɣɑ ŋkɑ pɑɑ hɑ Tɑcɑɑ mɑ́ nɑ pǝ́ kɛɛlɩ kʋtɔntʋ ɑsilimɑ tɔ. Nɑ ɩ́ cɑɑ mʋlʋm kʋpɑm mpi pɑ nuɣutinɑ nim tɔɣɔ kiloonɑɑ tooso nɑ nim liitili titite,

²²nɑ ɩhokɑsɩ nɑɑlɛ yɑɑ ɑlukukunɑɑ nɑɑlɛ. Pǝ tɑɑ mpi ɩ kɑ hiki tɔ. Nɑ pɑ́ lɑnɑ lɛlʋ kɛ ɑsilimɑ kɛɛlʋɣʋ kɔtɑɣɑ, nɑ lɛlʋ kɛ kɔtɑɣɑ ŋkɑ kɔkɔ lusɑ kɑ tǝnɑ tɔ.

²³Pǝ tɑkɩ kʋyɑkʋ pǝlefɛɩ nɑɑnʋwɑ nyǝŋkʋ ɩlɛnɑ ɩ́ ponɑ kʋhɑɑŋ ɩnǝɣɩ kɔtʋlʋ kɛ tǝsulle cokǝle nɔnɔɣɔ kɛ Tɑcɑɑ kiŋ.

²⁴Ɩlɛnɑ kɔtʋlʋ kpɑɣɑ ɩwǝyɑɣɑ nɑ nim nɑ ɩ́ hɑ Tɑcɑɑ.

²⁵Kɔtʋlʋ tɛŋ ɑsilimɑ kɛɛlʋɣʋ ɩwǝyɑɣɑ kɛ lɛntʋɣʋ ɩlɛnɑ ɩ́ lii cɑlǝm tɑɑ nɑ ɩ́ tɑɑ ɑsilimɑ tʋ ŋkpɑŋʋɣʋ ntɔɣɔŋ nyǝŋkʋ nɔɣɔ tɑɑ, nɑ ɩ́ tɑɑ tɔtɔɣɔ ɩ niŋ ntɔɣɔŋ ɑpɑlʋmpǝle nɑ ɩ ɑpɑlʋnɔmpǝle ntɔɣɔŋ nyǝntɛ tɔɔ.