Leevi 6:1-17

¹Ɠɔoɠɔ GALAGI ɓɔɛni Moize ʋɔ, é ɠɛ ma:

²«Niima levei ve Aalɔn ta ná-doun zunuiti zea, è ɠɛ ti ma: Gala zalaɠai ma lɔgi ɠaa: Gala zalaɠai ɠa yɛ zalaɠa ɠulazuʋɛ ma lutui zu, kpidii ɲɛgɛlɛin eyɛsu sobui, zalaɠa ɠulazuʋɛ ma abui ɠa yɛ sosu.

³Sobui, zalaɠa ɠula nui ɠa ná-seɠei loo ɠɔba, é ʋɛlɛ kpuɠagi lɛ ɓɔɠɔ ma, niiti ti ga gezei. Toɠa zuʋui ɠula, nii abui kulaai gala zalaɠai ɠalazuʋɛ, toɠa sei zalaɠa ɠulazuʋɛ ɠoba.

⁴Naa ʋoluma toɠa ná-seɠeiti pu, é taɠiligaa loo, ga é li ga zuʋui ti-ʋuuzuʋɛ ʋoluʋɛ, ada ɲadegai ta zu.

⁵Abui ɠa yɛ sosu zalaɠa ɠulazuʋɛ, é mina za ɲɛgɛlɛin. Sobu-o-sobu, zalaɠa ɠula nui ɠa abui lo koʋii ʋa, é gala zalaɠai ɓɛtɛ, é ziilɛi zalaɠaiti ma wulɔi ɠala.

⁶Abui ɠa yɛ sosu ɠɔ zalaɠa ɠulazuʋɛ, é mina za.

⁷«Vebɛanii ma lɔgi ɠaa: Aalɔn ná-doun zunuiti ta kula Ɠɔoɠɔ GALAGI ɠaazu, zalaɠa ɠulazuʋɛ ɠakalaʋɛ.

⁸Zalaɠa ɠula nui ɠa zeeɲɛ gila seɠe ani vukɔi zu, nii gulɔi ʋuai ma, é pɛɛ ani maku nɛɛnɛgi kpein ba. Toɠa naa ɠala zalaɠa ɠulazuʋɛ ga ɠizɛsui, makugi nɛai Ɠɔoɠɔ GALAGI ʋɛ.

⁹Aalɔn ta ná-doun zunuiti ta vebɛanii mɔtai mi. Ta mi ada ɲadegai ta, GALA daaɠomi seɠe ʋɛlɛi ma ɠoizuʋɛ, kɛlɛ lɛʋɛ mina ɠɛ ba.

¹⁰Nu mina lɛʋɛ ʋu ma, é ʋa mɔ da. Tɔnɔi ɠana gè feai ti ʋɛ nà-vebɛaniiti su, ti ɠalazu abui ɠa. Ani ʋe gola ɲadegai, eɠɛ koto gba zalaɠai ɓaa faazuɓɛtɛ zalaɠai.

¹¹Zunui kpein ka ta mi, Aalɔn ná-doun zunuiti saama. Tɔgi ɠana wo-mavofodaiti kpein bɛ eyɛsu ɠɔ, é lo vebɛaniiti ba, ti ɠalazu Ɠɔoɠɔ GALAGI ʋɛ. Nu-o-nu a vɔɔɠu ba, naa ɠa ɲade.»

¹²Ɠɔoɠɔ GALAGI ɓɔɛni Moize ʋɔ, é ɠɛ ma:

¹³«Wɛlɛ vebɛanii ʋa, Aalɔn ta ná-doun zunuiti ta fe Ɠɔoɠɔ GALAGI ʋɛ, foloi ta gulɔ ɲadegai ziɛna la ti ma: kilo saʋagɔ ɓulu vukɔ ʋagɔi zu, gilazuʋɛ sobui, gilazuʋɛ kpɔkɔi, eɠɛ folo-o-folo vebɛanii.

¹⁴Ɓulu vukɔi ɠa ɠaayɔ ga gulɔi, é la gee kɔlui maazu. Ɗa geegai ta teʋeleʋeai ɠula ga zalaɠai, makugi nɛai Ɠɔoɠɔ GALAGI ʋɛ.

¹⁵Zalaɠa ɠula nui niigi, Aalɔn ná-doun zunuiti saama, gulɔ ɲadegai a ziɛ ma ga é zei potogi zu, naa ɓalaa ɠa vebɛanii naa ɠula. Ɠɔoɠɔ tɔgi ʋe. Toɠa ɠala ɲɛgɛlɛin Ɠɔoɠɔ GALAGI ɠaazu.

¹⁶Zalaɠa ɠula nui ná-zalaɠai kpein ka ɠala ɲɛgɛlɛin, tanɔpɛ ge la mia.»

¹⁷Ɠɔoɠɔ GALAGI ɓɔɛni Moize ʋɔ, é ɠɛ ma: